Մայիս 12-ին, առաւօտեան ժամը 10:00-ի սահմաններուն, ատրպէյճանական կողմը Սոթքի ուղղութեամբ խախտած է զինադադարը` կիրառելով անօդաչու թռչող սարք, տեղեկացուցած է Հայաստանի Պաշտպանութեան Նախարարութիւնը:
Հայաստանի զինուած ուժերու մէկ զինւոր զոհուած է եւ երկու զինուորներ վիրաւորում ստացած են, մէկուն վիճակը կը գնահատուի բաւարար, միւսինը` ծանր:
Պաքուն իր հերթին հաղորդած է, որ Մայիս 11-ի լոյս 12-ի գիշերը սահմանի «Պասարքեչերի շրջանի Զօդի (Սոթք) ուղղութեամբ իրավիճակը յարաբերական հանգիստ եղած է», մեղադրելով Հայաստանը վերջին 24 ժամուան ընթացքին այլ ուղղութիւններով 17 անգամ ատրպէյճանական բանակի դիրքերը գնդակոծելու մէջ:
Սոթքի հատուածին մէջ իրադրութիւնը երէկուընէ լարուած է․ երէկ առաւօտեան Հայաստանի Պաշտպանութեան Նախարարութիւնը հաղորդած էր, որ ժամը 6-էն Ատրպէյճանի զինուած ուժերու ստորաբաժանումները հրետանային եւ ականանետային կրակ բացած են Սոթքի դիրքերու ուղղութեամբ, հայկական զինուած ուժերը պատասխան գործողութիւններու ձեռնարկած են: Հայկական կողմը հաղորդած է իր չորս վիրաւորներու, ատրպէյճանական կողմը` մէկ զոհի եւ մէկ վիրաւորի մասին:
Ըստ Հայաստանի ռազմական գերատեսչութեան, երեկոյեան արձանագրուած են ատրպէյճանական կողմէ Սոթքի, Նորաբակի եւ Վերին Շորժայի ուղղութիւններով ականանետի եւ հրետանային միջոցի կիրառման դէպքեր: