ԱՄՆ Պետական Քարտուղարութիւնը հաստատած է իր մտադրութիւնը` «շարունակելու աշխուժօրէն զբաղիլ» ղարաբաղեան հարցով:
«Աւագ խորհրդական Լուի Պոնօն, պետական քարտուղարի օգնական Տերեք Հոկանը, պետական քարտուղար Էնթընի Պլինքընը այսուհետ եւս պիտի շարունակեն աշխուժօրէն զբաղիլ այդ հարցով», ըսած է Պետական Քարտուղարութեան մամուլի քարտուղարի տեղակալ Վետանթ Փաթելը:
«… Դուք գիտէք, որ Հարաւային Կովկասի մէջ այս հարցը այն է, որ ինքը պետական քարտուղար Պլինքընը խորապէս կը գնահատէ եւ մեծ նշանակութիւն կու տայ», ըսած է ան:
Կովկասի հարցերով բանակցող Պոնօն, ինչպէս նաեւ պետական քարտուղարի օգնականի տեղակալ Էրիքա Օլսոնը անցեալ շաբաթ առանձին այցելութիւններ կատարած էին տարածաշրջան` ընդամէնը քանի մը օր առաջ այն բանէն, երբ Ատրպէյճանը յայտարարեց Լաչինի միջանցքին անցակէտ ստեղծելու մասին:
Փաթել յիշեցուցած է, որ Պետական Քարտուղարութիւնը Կիրակի օր խոր մտահոգութիւն յայտնած է այդ քայլին առնչութեամբ: «Անկեղծ ըսած, անցակէտի ստեղծումը կը խաթարէ խաղաղութեան գործընթացին վստահութիւն հաստատելու ուղղութեամբ ջանքերը, եւ մենք հաւատարիմ ենք այն կարծիքին, որ պէտք է ըլլայ մարդոց եւ բեռերու ազատ տեղաշարժ Լաչինի միջանցքով», ըսած է ան:
Փաթել ձեռնպահ մնացած է Պաքուի եւ Երեւանի մէջ պաշտօնատար անձերու հետ ԱՄՆ դիւանագէտներու խօսակցութիւններուն բովանդակութիւնը մեկնաբանելէ:
