Հայաստանի 63 դպրոցի մէջ կ’իրականացուի ռուսերէնի խորացուած ուսուցում, որմէ 33-ը՝ Երեւան քաղաքին մէջ, 30-ը՝ մարզերուն մէջ:
Հայաստանի հանրակրթական ուսումնական հաստատութիւններուն մէջ առարկան պարտադիր կը դասաւանդուի՝ սկսած 2-րդ դասարանէն:
Այս մասին «Հայկական Ժամանակ»-ի գրաւոր հարցումին ի պատասխան՝ յայտնած են Կրթական գերատեսչութենէն:
Ըստ ԿԳՄՄ-ի, Երեւանի մէջ՝ 19, իսկ մարզերուն մէջ 18 պետական դպրոցներու դասարաններ կ’ուսուցանուին ռուսերէն: Ոչ-պետական դպրոցները մայրաքաղաքին մէջ երեք հատ են։ Մարզերուն մէջ ռուսերէն ուսուցմամբ ոչ-պետական դպրոցներ չկան։
Ընդհանուր առմամբ Երեւանի մէջ առկայ պետական եւ ոչ-պետական դպրոցներուն մէջ ռուսերէն ուսուցանուող աշակերտներուն թիւը 5 հազար 173 է, իսկ մարզերուն մէջ՝ 1873:
Հայաստանի մէջ ամբողջութեամբ ռուսական ծրագրով դասաւանդուող ընդամէնը մէկ պետական դպրոց կայ, ուր աշակերտներուն թիւը 133 է: Այն Ֆիոլեթովոյի միջնակարգ դպրոցն է: Սա պետական դպրոց է, սակայն կը գործէ մարզային ենթակայութեան ներքոյ: Համայնքը ռուսական է, եւ այնտեղ կ’ապրին մեծ մասամբ ազգութեամբ ռուսեր:’
Կայ նաեւ մէկ ոչ-պետական դպրոց ամբողջութեամբ միայն ռուսերէն ուսուցմամբ, ուր աշակերտներուն թիւը 279 է: Այն Երեւանի «Ռոսիա» հասարակական կազմակերպութեան «Սլավյանսքայա» միջնակարգ դպրոցն է:
Հայաստանի մէջ կայ նաեւ երեք ռուսական դպրոց, որոնք Հայաստանի ենթակայութեան ներքոյ չեն․ անոնցմէ մէկը՝ Կիւմրիի մէջ, մէկը՝ Քանաքեռի, իսկ միւսը Արտաշատի մէջ է: Այս կրթական հաստատութիւնները Ռուսիոյ Պաշտպանութեան նախարարութեան ենթակայութեան տակ են եւ կը սպասարկեն Հայաստանի մէջ տեղակայուած ռուսաստանցի զինուորականներու ընտանիքներուն։