Ֆրանսայի նախագահ Էմանուէլ Մաքրոն նամակ ուղղած է ՀՀ նախագահ Վահագն Խաչատուրեանին Հայոց Ցեղասպանութեան 108-րդ տարելիցին առիթով, որուն մէջ նշուած է.
«Ապրիլ 24-ին, Ֆրանսան կ’ոգեկոչէ 1915 թուականի Հայոց Ցեղասպանութեան 108-րդ տարելիցը: Ֆրանսան կը յիշէ այն տղամարդիկը, կիներն ու երեխաները, որոնք սպաննուեցան, սովէն կամ ուժասպառութենէն մահացան տեղահանութեան ճանապարհներուն: Ֆրանսան ձեզի հետ միասին կը յիշէ 1915 թուականի Սեպտեմբերին Մուսայ լերան դիմադրութեան հայ մարտիկներուն օգնութեան հասած իր նաւաստիները: Ֆրանսան, որ Ժորժ Քլեմանսոյի, Անաթոլ Ֆրանսի եւ Ժան Ժորեսի ձայնով դատապարտած էր Օսմանեան Կայսրութեան մէջ իրագործուած հայերու ջարդերը, այսօր ձեր կողքին է` պաշտպանելու զոհերուն յիշատակը, պայքարելու ժխտողականութեան դէմ եւ լուրջ դասեր քաղելու այդ ողբերգական պատմութեան էջէն:
Նոյնիսկ այսօր, երբ եւրոպական ցամաքամասը կը սգայ սարսափելի յարձակման պատճառով, Ֆրանսան կը շարունակէ իր պայքարը յանուն յիշողութեան եւ ընդդէմ մոռացութեան: Եւրոպական Միութեան Խորհրդին մէջ Ֆրանսայի նախագահութեան օրօք 2022 թուականին աւարտին հասցուցինք թուային ծառայութիւններու մասին օրէնքի նախագիծը, որպէսզի այլեւս անպատիժ կերպով չժխտուի ցեղասպանութիւնը: Ֆրանսան կը ցուցաբերէ մշտական զգօնութիւն իր երկրի տարածքին: 2019 թուականին Հանրապետութեան օրացոյցին մէջ սահմանեցի Հայոց Ցեղասպանութեան յիշատակման օր, քանի որ կը փափաքիմ, որ իւրաքանչիւր ֆրանսացի յիշէ այդ օրը: Յանուն արդարութեան եւ պատմական ճշմարտութեան այս պայքարը հայերունն է, բայց նաեւ ամբողջ Ֆրանսայինը, քանզի մարդու իրաւունքներուն յարգումը Ֆրանսայի Հանրապետութեան եղբայրութեան հիմքին է:
Ցեղասպանութեան յիշատակումը կը յիշեցնէ նաեւ հայերու զբաղեցուցած տեղը մեր պատմութեան մէջ, քանի որ այս ողբերգութենէն բազմաթիւ փրկուածներ միացած են մեր երկրին` նպաստելով անոր բարգաւաճման ու ազդեցութեան ուժեղացման:
Ոգեկոչման այս օրը, որ կը խորհրդանշէ նաեւ հայ ժողովուրդին վերածնունդը, կը փափաքիմ հաւաստել Ֆրանսայի աջակցութիւնը Հայաստանի մէջ տեղի ունեցող ժողովրդավարական բարեփոխումներուն, ինչպէս նաեւ տարածաշրջանին մէջ խաղաղութիւն կերտելու գործընթացներուն:
Հաճեցէք ընդունիլ, պարոն նախագահ, յարգանքներուս գերագոյն հաւաստիքը», նշուած է նամակին մէջ:
