ԱՄՆ պետական քարտուղար Էնթընի Պլինքընի համար կը շարունակէ մեծ նշանակութիւն ունենալ Հայաստանի եւ Ատրպէյճանի միջեւ բռնութիւններու դադրեցումը, յատկապէս` Լեռնային Ղարաբաղի տարածաշրջանին մէջ: Այդ մասին յայտնած է ԱՄՆ Պետական Քարտուղարութեան խօսնակի առաջին տեղակալ Վետանթ Փաթելը:
«Ան հնարաւորութիւն ունեցած է քանի մը անգամ հանդիպելու այս երկիրներու ղեկավարներուն հետ Միւնիխի Անվտանգութեան Համաժողովի ծիրին մէջ: Մենք կը շարունակենք այդ հարցին մէջ մեծապէս ներգրաւուած մնալ: Այդ հարցին մէջ Պրն. Պոնօն (Խմբ.` Լուիս Պոնօ` Կովկասեան բանակցութիւններու հարցերով ԱՄՆ Պետական Քարտուղարութեան աւագ խորհրդական) կը շարունակէ ներգրաւուած մնալ` այս գերատեսչութեան մէջ միւսներուն հետ միասին», ըսած է Փաթելը:
Դիւանագէտը նշած է, որ առայժմ այլ մեկնաբանութիւն չունի` կապուած Լուիս Պոնոյի` Հարաւային Կովկաս այցի հետ:
Կովկասեան բանակցութիւններու հարցերով ԱՄՆ Պետական Քարտուղարութեան աւագ խորհրդական, ԵԱՀԿ Մինսքի Խումբի ամերիկացի համանախագահ Լուիս Պոնօն Ապրիլ 14-էն սկսեալ տարածաշրջան կ’այցելէր: Ապրիլ 20-ին զայն ընդունած է ՀՀ վարչապետ Նիկոլ Փաշինեանը: Կողմերը քննարկած են Լեռնային Ղարաբաղի հակամարտութիւնը, Ստեփանակերտի եւ Պաքուի միջեւ երկխօսութեան միջազգային մեխանիզմի ձեւաւորումը, Լաչինի շրջափակման հետեւանքով Արցախի մէջ ստեղծուած մարդասիրական ճգնաժամը եւ այլ հարցեր: