Եւրոմիութիւնը ափսոսանք կը յայտնէ հայ-ատրպէյճանական սահմանին Տեղ գիւղի շրջանին մէջ նախօրէին տեղի ունեցած ռազմական բախումներուն առնչութեամբ, որուն հետեւանքով երկու կողմերէն զոհեր եւ վիրաւորներ կան:
«Այս միջադէպը եւս մէկ անգամ կ’ընդգծէ, որ սահմաններու սահմանազատման բացակայութեան պայմաններուն մէջ պէտք է պահպանել 1991 թուականի սահմանային գիծը, եւ այդ գիծէն երկու կողմերուն ուժերը պէտք է ետ քաշուին անվտանգային հեռաւորութեան վրայ` խուսափելու նման միջադէպերէ», նշուած է Եւրոմիութեան յայտարարութեան մէջ:
Պրիւքսէլը կը նշէ, որ նախկին պարտաւորութիւնները պէտք է յարգուին, ներառեալ 2022-ի Հոկտեմբերին Փրակի մէջ ձեռք բերուած պայմանաւորուածութիւնները` փոխադարձաբար ճանչնալ տարածքային ամբողջականութիւնը 1991 թուականի Ալմա Աթայի հռչակագրի հիման վրայ:
Եւրոմիութիւնը նաեւ կոչ կ’ընէ աշխուժացնելու սահմանի սահմանազատման բանակցութիւնները եւ պատրաստակամ է աջակցելու այդ գործընթացին:
Եւրոմիութիւնը կրկին կոչ կ’ընէ զսպուածութիւն ցուցաբերելու եւ բոլոր վէճերը կարգաւորելու խաղաղ ճանապարհով:
«Եւրոմիութիւնը կը շարունակէ աջակցիլ այդ ջանքերուն, ընդ որում ամենաբարձր մակարդակով, ինչպէս նաեւ Հայաստանի մէջ Եւրոմիութեան առաքելութեան ներկայութեան միջոցով», ըսուած է յայտարարութեան մէջ: