Եւրոպական Խորհուրդի նախագահ Շարլ Միշէլ Պրիւքսէլի մէջ Հայաստանի եւ Ատրպէյճանի միջեւ բանակցութիւններ կայացնելու հրաւէր ուղարկած է կողմերուն: Այս մասին լրագրողներու հետ ճեպազրոյցին ըսած է ԱՄՆ Պետական Քարտուղարութեան խօսնակ Նետ Փրայս:
«Մենք մեծապէս կ’աջակցինք ԵՄ գործընթացին, եւ պէտք է նշեմ, որ Եւրոպական Խորհուրդի նախագահ Միշէլի կողմէ առաջարկ կայ` հիւրընկալել կողմերը Պրիւքսէլի մէջ: Այդ հնարաւորութիւն է, եթէ անոնք ընդունին զայն, բանակցիլ` շարունակելու այն յառաջընթացը, որ մենք տեսած ենք վերջին շաբաթներու ընթացքին», ըսած է Նետ Փրայս:
ԱՄՆ Պետական Քարտուղարութեան ներկայացուցիչը նշած է, որ, ըստ իր տեղեկութիւններուն, կողմերուն հրաւէր ուղարկուած է եւ հնարաւորութիւն տրուած է Պրիւքսէլի մէջ հանդիպում կայացնելու համար:
«Ի վերջոյ, որեւէ նման հանդիպման իրենց հնարաւոր մասնակցութեան մասին պէտք է խօսին կողմերը` մեր հայ գործընկերները, մեր ատրպէյճանցի գործընկերները», ըսած է Փրայս` պատասխանելով հանդիպման հնարաւոր ժամկէտերու վերաբերեալ հարցումին:
Փրայս յաւելած է, որ խնդիրին համապարփակ լուծում գտնելուն ուղղուած բանակցութիւններու ընթացքին ԱՄՆ պատրաստ է աջակցելու կողմերուն: