Հայաստանի մէջ նախորդ տարի անշարժ գոյքի շուկային մէջ աշխուժութիւն նկատուած է, իրականացուած գործարքներուն թիւը աճած է, առքուվաճառքի 52 հազարէն աւելի գործարքներէն աւելի քան 4900-ի կողմ հանդիսացած են օտարերկրեայ քաղաքացիներ, ընդ որում` օտարերկրեայ քաղաքացիներէն ամենաշատ անշարժ գոյք ձեռք բերած են ռուսերը:
Նախորդ տարի աննախադէպ աշխուժութիւն նկատուած է վարձակալութեան շուկային մէջ, Երեւանի մէջ, օրինակ, վարձակալութեան գործարքները աւելցած են մօտ 10 տոկոսով, անշարժ գոյքի գործակալութեան մէջ արձանագրած են բնակարաններու վարձակալութեան գիներու մօտ 100 տոկոս աճ, ինչ որ, սակայն, վերջին 2 ամսուան մէջ որոշակիօրէն նուազած է, օտարերկրեայ վարձակալներուն մէկ մասը հեռացած է, բնակարանները կ’ազատուին:
Ըստ Կադաստրի Կոմիտէին հրապարակած տուեալներուն` 2022 թուականէն Հայաստանի մէջ անշարժ գոյքի նկատմամբ իրականացուած է 204 հազար 910 գործարք, ինչ որ 2021-ի 201 հազար 563 գործարքի համեմատ աճած է 1.7 տոկոսով:
2022 թուականին իրականացուած է առքուվաճառքի 52 հազար 928 գործարք, ինչ որ 5.6 տոկոսով նուազած է 2021-ին արձանագրուած 56 հազար 44 գործարքին նկատմամբ: Թէեւ առքուվաճառքի գործարքները ընդհանուր առմամբ նուազած են, սակայն բնակարաններու առքուվաճառքի գործարքները 2021-ի համեմատ աւելցած են 3 տոկոսով` կազմելով 17 հազար 84: 4936 առքուվաճառքի գործարքի կողմ հանդիսացած են օտարերկրեայ քաղաքացիները, որ կազմած է առքուվաճառքի գործարքներուն 9.3 տոկոսը:
2022 թուականին օտարերկրեայ քաղաքացիները Հայաստանի մէջ գնած են 1950 միաւոր անշարժ գոյք` 22.9 տոկոսով աւելի 2021-ի համեմատ եւ վաճառած են 3173 միաւոր անշարժ գոյք` 0.6 տոկոսով աւելի 2021-ի համեմատ: Օտարերկրեայ քաղաքացիները 2022-ին Հայաստանի մէջ գնած են 991 բնակարան, ինչ որ 36.9 տոկոսով աւելի է 2021-ին գնած բնակարաններուն համեմատ: Օտարերկրեայ քաղաքացիները նախորդ տարի Հայաստանի մէջ գնած են 330 բնակելի տուն, 369 հող, 25 արտադրական նշանակութեան շինութիւն, 82 հասարակական նշանակութեան շինութիւն, 153 ինքնաշարժի տնակ: Այս բոլոր գործարքներուն մէջ աճ նկատուած է 2021-ի համեմատ:
Ընդ որում, օտարերկրեայ քաղաքացիներէն Հայաստանի մէջ ամենաշատը անշարժ գոյք ձեռք բերած եւ վաճառած են Ռուսիոյ Դաշնութեան քաղաքացիները: Ռուս քաղաքացիները Հայաստանի մէջ 2022-ին գնած են 1207 անշարժ գոյք, ինչ որ 2021-ի համեմատ աւելցած է 44.9 տոկոսով, իսկ վաճառած են 2380 անշարժ գոյք, ինչ որ 7 տոկոսով աւելի քիչ է, քան 2021-ի վաճառուածները: Այնուհետեւ ամենաշատ թիւով գործարքներ կատարած են ԱՄՆ քաղաքացիները, գնած են 240 անշարժ գոյք, վաճառած` 274-ը, Իրանի քաղաքացիները նախորդ տարի Հայաստանի մէջ գնած են 84 անշարժ գոյք, վաճառած՝ 67: