Լահէյի դատարանը, որ մախօրէին լսեց Հայաստանի հայցը ընդդէմ Ատրպէյճանի, յառաջիկայ ամիսներուն, լաւագոյն պարագային շաբաթներու ընթացքին որոշում պիտի կայացնէ: Հայկական կողմը, հարցին հրատապութիւնը հաշուի առնելով, խնդրած է հնարաւորինս արագ արձագանգել իր դիմումին:
Հայաստանը միջազգային դատարանէն կը պահանջէ հրատապ միջոց կիրառել եւ պարտաւորեցնել Ատրպէյճանին` բանալ արդէն մէկուկէս ամիսէ փակուած Լաչինի միջանցքը, ապահովել մարդոց, փոխադրութեան ազատ, երկկողմ տեղաշարժը, ինչպէս նաեւ անյապաղ վերականգնել ուժանիւթի մատակարարումը:
Ատրպէյճանը, ի պատասխան, հակադարձեց, որ Հայաստանի մեղադրանքները անհիմն են: Ատրպէյճանի ներկայացուցիչ Էլնուր Մամետովի խօսքով` Հայաստանը Լաչինի միջանցքին փակ ըլլալը կ’օգտագործէ որպէս քաղաքական լծակ:
«Ատրպէյճանը ՄԱԿ-ի եւ ԵԱՀԿ-ի առջեւ վերահաստատած է, որ չէ պարտադրած որեւէ սահմանափակում Լաչինի երկայնքով երթեւեկելուն եւ ոչ ալ կրնար ընել, քանի որ 2020-ի Նոյեմբեր 9-ի եռակողմ համաձայանագրին համաձայն` Լաչինի միջանցքը կը գտնուի Ռուսիոյ Դաշնութեան խաղաղապահներու վերասկողութեան տակ: Բողոքի շարժումին մասնակիցները պարբերաբար կը յայտնեն, որ որեւէ նպատակ չունին եւ չեն ունեցած ճանապարհ փակելու: Իրականութեան մէջ ամէն օր տասնեակ ինքնաշարժներ եւ բեռնատարներ կ’անցնին բողոքի շարժումի վայրին կողքով: Մինչ ես այստեղ կը խօսիմ, 19 հոգի Կարմիր Խաչի ուղեկցութեամբ անցած են միջանցքով», ըսած է Մամետով:
Մինչդեռ հայկական կողմը նոյնինքն այդ կ’ընգծէ, որ ինքնաշարժները միայն Կարմիր Խաչի ուղեկցութեամբ կ’անցնին, Արցախի բնակիչներուն համար կեանքի ճանապարհը փակ է:
Հայաստանի ներկայացուցիչ Եղիշէ Կիրակոսեանը ՄԱԿ-ի Արդարադատութեան Դատարանէն անյապաղ միջոցներ կ’ակնկալէր, հակառակ պարագային Լեռնային Ղարաբաղի հայերը անհնարին ընտրութեան առջեւ պիտի կանգնին` թողել իրենց պապենական տուները, կամ մնալ այնտեղ եւ սովամահ ըլլալ:
«Նախագահ Ալիեւը բացայայտ պահանջել է, որ Լեռնային Ղարաբաղի հայերը հեռանան: Նա պնդել է, որ Ատրպէյճանի հիմնական պարտքը հայերին իրենց հողերից վտարելն է: Նա ասել է, որ հայերեն ոչ մի երգ չի երգուելու, եւ, որ այսուհետեւ ատրպէյճաներէնն է իշխելու այդ հողում», ըսաւ Կիրակոսեան:
ՄԱԿ-ի Արդարադատութեան միջազգային դատարանին մէջ քննուեցաւ նաեւ Ատրպէյճանի հայցը ընդդէմ Հայաստանի: Պաքուն կը պահանջէ Հայաստանին պարտաւորեցնել դադրեցնել «ատրպէյճանական տարածքներու ականապատումը»: Հայկական կողմը եւս երկու ժամ ունեցաւ հակափաստարկներ ներկայացնելու համար:
