«Յաջորդ շաբաթ Ռուսիոյ նախագահ Վլատիմիր Փութին պիտի այցելէ Հայաստան», լրագրողներու հետ զրոյցին այս մասին հաղորդած է Քրեմլինի պաշտօնական ներկայացուցիչ Տմիթրի Փեսքովը: Անոր խօսքով` Փութին պիտի մասնակցի Երեւանի մէջ կայանալիք ՀԱՊԿ գագաթաժողովին:
Աւելի վաղ յայտարարուած էր, որ Հաւաքական Անվտանգութեան Պայմանագրի Կազմակերպութեան անդամ պետութիւններու ղեկավարներուն հաւաքը պիտի կայանայ Հայաստանի մայրաքաղաքին մէջ` Նոյեմբեր 23-ին:
Հայաստանի վարչապետ Նիկոլ Փաշինեանի նախագահութեամբ Երեւանի մէջ կայանալիք Հաւաքական Անվտանգութեան Պայմանագրի Կազմակերպութեան (ՀԱՊԿ) գագաթաժողովի քննարկելիք կարեւորագոյն հարցերէն պիտի ըլլայ ՀԱՊԿ ճգնաժամային արձագանգման համակարգի կատարելագործումը եւ Հայաստանին օժանդակութեան ցուցաբերման համատեղ միջոցները: Այս մասին ըսուած է կազմակերպութեան մամուլի քարտուղարի հաղորդագրութեան մէջ:
