Բաց թողնուած առաջին հայկական արբանեակէն բացի Հայաստան կը մտածէ նաեւ երկրորդ արբանեակ բաց թողնելու մասին, որ կրնայ ըլլալ հայկական արտադրութեան: Այս մասին 18 Նոյեմբերին կայացած ասուլիսի ընթացքին ըսաւ ՀՀ բարձր արհեստագիտութեան արդիւնաբերութեան փոխնախարար Աւետ Պօղոսեանը` անդրադառնալով երկրին մէջ արբանեակաշինութեան զարգացման վերաբերեալ հարցին:
«Տիեզերական ծրագրերը բաւականին երկարաժամկէտ պլանաւորման արդիւնք են լինում: Առաջին արբանեակի արձակումը մեզ մօտ ստացուել է շատ աննախադէպ արագութեամբ: Բայց այդ ընթացքում կուտակուած ներուժը եւ ձեռքբերումները մեզ թոյլ են տալիս խօսել այն մասին, որ մենք շատ արագ կ’անցնենք արդէն պետական երկրորդ արբանեակի կազմակերպման, նախագծման աշխատանքներին: Այն առաջիյ արբանեակից էականօրէն կը տարբերուի ոչ միայն իր տեխնիկական յատկութիւններով, այլ նաեւ այն բանով, որ եւ նախագծման, եւ ամենայն հաւանականութեամբ, համարկման զգալի մասը կարուի Հայաստանում: Այն ոչ միայն կը լինի երկրորդ հայկական արբանեակը, այլ նաեւ կը լինի հայկական արտադրութեան առաջին արբանեակը», ըսաւ Պօղոսեան` յաւելելով, որ այդ է նպատակը:
Նախարար Ռոպերթ Խաչատրեան նշեց, որ Հայաստանի մէջ SATLANTIS ընկերութեան գրանցումը արդէն նախանշած քայլերէն մէկն էր արբանեակաշինութեան զարգացման ուղղութեամբ:
Միեւնոյն ժամանակ փոխնախարարը վստահեցուց, որ Հայաստանի Հանրապետութեան տիեզերական ծրագիրները կը կրեն բացառապէս խաղաղ բնոյթ, եւ արբանեակէն ստացուած տուեալները կ՛օգտագործուին բացառապէս խաղաղ նպատակներով, այդ շարքին` անվտանգային նպատակներով վերահսկողութիւն իրականացնելու համար:
Ասուլիսին ընթացքին ներկայացուեցան նաեւ երկրագունդի տարբեր կէտերէ առնուած լուսանկարներ, օրինակ` Հայաստանի արեւելեան սահմանագծին մօտ գտնուող պատկեր, որ առնուած է 14 Սեպտեմբերին:
25 Մայիսին ԱՄՆ-էն բաց թողնուած է հայկական առաջին արբանեակը: «ARMSAT-1» հայկական առաջին արբանեակը քննութեան դրական արդիւնքներ ցոյց տուած է, ամբողջութեամբ պատրաստ է շահագործման: