«Իմ կարծիքով` մենք շատ կարեւոր քայլ ենք անում եւ պետութեան կարեւորագոյն հիմնարկներից մէկի վերաբերեալ որոշում ենք կայացնում: Նման քայլերի տրամաբանութիւնը թերեւս բխում է մեր գաղափարական այն արձանագրումից, որ պետութիւնը եւ Հայաստանի Հանրապետութիւնը կարող է յարատեւել միայն նրա քաղաքացիների` պետութիւն ունենալու կամքի առկայութեան վրայ: Այսինքն` պետութիւնը հիմնւում է պետութիւն ունենալու քաղաքացիական կամքի վրայ», Նոյեմբեր 17-ին, կառավարութեան հերթական նիստին քաղաքացիներու համընդհանուր յայտարարագրման վերաբերեալ հարցի քննարկման ընթացքին ըսաւ վարչապետ Նիկոլ Փաշինեան եւ յաւելեց, որ սա հիմնարկ մըն է, որ նոյնինքն այդ կամքին արձանագրումն է:
Վարչապետը այս առումով յիշեցուց անշարժ գոյքի հարկի հետ կապուած օրէնքը. «Մենք քաղաքական որոշում կայացրինք, որ եթէ մարդու գոյքահարկը տարեկան 100 դրամ է, այդ 100 դրամը քաղաքացին պէտք է վճարի. այդ 100 դրամը իր կեանքը հաստատ չի վատացնելու եւ պետական պիւտճէին էլ բան չի տալու, բայց դա արտայայտութիւն է լինելու պետութիւն ունենալու քաղաքացու կամքի»:
Նիկոլ Փաշինեանի խօսքով` սա աւելի համապարփակ որոշում է. «Եւ ես ուրախ եմ, որ մենք այս որոշումը կայացնում ենք, սակայն այն պէտք է լաւ նախագծել: Դրանում ոչ մի խնդիր չկայ, փուլային եղանակով է համակարգը ներդրւում: Պէտք է ամրապնդենք քաղաքական եւ քաղաքացիական կամքը, որը պէտք է արտայայտուի այդ թւում նաեւ պիւտճէի պետական եկամուտների աճով, որը պէտք է արտայայտուի նաեւ թափանցիկութեամբ, հաշուետուողականութեամբ: Եւ սա պետութիւն ունենալու քաղաքացիական կամքի հաստատութենական արտայայտութիւններից մէկն է»:
