Հանրապետութեան նախագահ Վահագն Խաչատուրեան ՄԱԿ-ի Կլիմայի փոփոխութեան ուխտի կողմերու 27-րդ համաժողովի ծիրին մէջ հանդիպում ունեցած է Արաբական Պետութիւններու Լիկայի գլխաւոր քարտուղար Ահմատ Ապուլ Ղէյթի հետ:
Նախագահ Խաչատուրեան նշած է, որ հայ-արաբական յարաբերութիւնները դարերու պատմութիւն ունին, եւ կը զարգանան քաղաքական, տնտեսական ու մշակութային բազմաշերտ փոխգործակցութեամբ: Նախագահը ընդգծած է, որ արաբական աշխարհին հետ յարաբերութիւնները մշտապէս կը գտնուին Հայաստանի արտաքին քաղաքականութեան առաջնահերթութիւններու շարքին:
Ահմատ Ապուլ Ղէյթ նշած է, որ արաբական աշխարհին մէջ Հայաստանը սիրուած գործընկեր եւ բարեկամ է, որուն հետ պատրաստակամ են հնարաւորինս ջանքեր ներդնել` աւելի սերտ փոխգործակցութեան հարթակներ ստեղծելու համար:
Զրոյցի ընթացքին նախագահ Վահագն Խաչատուրեան իր մտահոգութիւնները յայտնած է վերջերս Արաբական Պետութիւններու Լիկայի գագաթաժողովին Ատրպէյճանի նախագահի ելոյթին շարք մը հակահայկական եւ իրականութեան հետ կապ չունեցող դրուագներու վերաբերեալ, որոնց մէջ Ատրպէյճանի նախագահը փորձած է այլախեղել Ղարաբաղեան հակամարտութեան բովանդակութիւնը եւ այն ներկայացնել որպէս կրօնական հակամարտութիւն: Նախագահը շեշտած է, որ Հայաստանը բազմաթիւ բարեկամներ ունի իսլամական աշխարհին մէջ, Հայաստանի Հանրապետութիւնը ժողովրդավարական երկիր է, ուր կը բացառուի կրօնական կամ խտրականութեան, անհանդուրժողականութեան որեւէ դրսեւորում:
Արաբական Պետութիւններու Լիկայի գլխաւոր քարտուղարը ընդգծած է, որ միանշանակօրէն շահագրգիռ է քայլերու ձեռնարկել հնարաւորինս թիւրընկալումները հարթելու ուղղութեամբ եւ նպաստել սեփական դիրքորոշումը ներկայացնելու հայկական կողմի իրաւունքի ապահովման:
Զրոյցի աւարտին երկուստեք պայմանաւորուածութիւն ձեռք բերուած է շարունակել սերտ եւ բազմակողմ ձեւաչափով շփումները:
