«Զանգեզուրի միջանցքը Հայաստանի պարտաւորութիւնն է, որ ստանձնած է», Շուշիի մէջ յայտարարած է Իլհամ Ալիեւ` ելոյթ ունենալով Ատրպէյճանի «Յաղթանակի օրուան» առիթով հանդիսաւոր միջոցառման:
«Երկու տարի է մենք ձեռք չենք տար Լաչինի ճանապարհով Հայաստանէն Ղարաբաղ եւ հակառակ ուղղութեամբ երթեւեկող ինքնաշարժներուն: Մենք պարտաւորութիւն վերցուցած ենք եւ կը կատարենք զայն: Հայաստանը նոյնպէս պարտաւորութիւն ստանձնած է, որպէսզի ճանապարհային կապ ըլլայ Ատրպէյճանի արեւմտեան շրջաններու եւ Նախիջեւանի Ինքնավար Հանրապետութեան միջեւ: Անցած է երկու տարի, չկայ տեխնիկա-տնտեսական հիմնաւորում, գործողութիւն, երկաթգիծ, ճանապարհ: Որքա՞ն պէտք է սպասենք», ըսած է Ատրպէյճանի նախագահը` չյստակացնելով, թէ երբ եւ ինչ փաստաթուղթերով պաշտօնական Երեւանը «Զանգեզուրի միջանցք»ի իրականացման հարցով պարտաւորութիւն ստանձնած է:
Ալիեւը իր ելոյթին մէջ նաեւ պնդած է, որ Հայաստանը պէտք է իմանայ` Ատրպէյճանի բանակը աւելի ուժեղ է, քան երկու տարի առաջ: «Ինչպէս կառուցուածքային բարեփոխումները, այնպէս ալ նոր կազմաւորումներու ստեղծումը, միեւնոյն ժամանակ, առկայ կազմաւորումներու թիւին յաւելումը, անոնց զէնք-զինամթերքով մատակարարումները, նոր տեխնիկական յագեցուածութիւնը կ’իրականացուին ամենաբարձր մակարդակով: Ատրպէյճանական բանակը այժմ աւելի ուժեղ է, քան երկու տարի առաջ էր, եւ այդ պէտք է իմանան բոլորը` Հայաստանը եւ իւրաքանչիւր ոք», վստահեցուցած է Ատրպէյճանի առաջնորդը:
Իլհամ Ալիեւը նաեւ ըսած է, որ Պաքուն ոչ ոքէ չի վախնար` «եթէ վախնար, երբեք Ղարաբաղեան երկրորդ պատերազմը չէր սկսեր»:
«Թէեւ պատերազմը աւարտած է երկու տարի առաջ, այդուհանդերձ կան մտահոգիչ պահեր», յայտարարած է Ալիեւ` խօսքը ուղղելով «հայ ժողովուրդին». «Երեսուն տարուան բռնագրաւման դառնութիւնը հիմա անոնք կը տեսնեն` ինչ է բռնագրաւում, ինչ է կորուստները: Մենք անոնց ուղղակի պատասխանած ենք` կռուած ենք մեր հողին վրայ, բռնագրաւողը քշած ենք մեր հողերէն: Սա պէտք է հասկնան, որպէսզի չդառնան այն շրջանակներուն զոհը, որոնք դուրսը նստած` երկրորդ անգամ կ’ուզեն այս տարածաշրջանին նայիլ որպէս խաղադաշտ»:
Ալիեւ յաւելած է, որ Հայաստանը պէտք է իմանայ, որ «ներկայիս շրջանակներուն մէջ» Ատրպէյճանին կը զսպէ ոչ թէ Հայաստանի ինչ-որ հովանաւորի յայտարարութիւն, այլ Պաքուի «սեփական քաղաքականութիւնը»:
