Մինչեւ տարեվերջ արդէն կրնայ խաղաղութեան համաձայնագիր ստորագրուիլ, եթէ Հայաստանը «բարի կամք ցուցաբերէ», յայտարարած է Իլհամ Ալիեւ՝ Փրակի մէջ քառակողմ հանդիպման առաջին փուլէն յետոյ ատրպէյճանական լրատուամիջոցներուն տուած հարցազրոյցին մէջ:
«Կը կարծեմ, որ եթէ մօտ ապագային որոշում կայացուի, աշխատանքային խումբերը պիտի սկսին աշխատիլ խաղաղութեան պայմանագրի բնագրին վրայ, եւ մենք կրնանք մինչեւ տարեվերջ հասնիլ համաձայնեցման: Ըստ էութեան, մեր կողմէ յայտարարուած հինգ սկզբունքներուն հետ կապուած հարցեր չունի ոչ հայկական կողմը, ոչ ալ Եւրոմիութիւնը: Ֆրանսայի նախագահին հետ հանդիպման ես տեսայ, որ անոնք բոլորին կողմէ կ’ընդունուին», ըսած է Ատրպէյճանի նախագահը:
Ալիեւի խօսքով` քառակողմ հանդիպումը կարեւոր նշանակութիւն պիտի ունենայ խաղաղութեան պայմանագրին հասնելու համար:
Հայկական կողմը, ընդունելով Ատրպէյճանի առաջարկները, սեփականը ներկայացուցած էր, թէ անհրաժեշտ է նաեւ Ղարաբաղի մէջ ապրող հայերու իրաւունքներն ու անվտանգութիւնը ապահովել: Ալիեւը, մինչդեռ, կրկին պնդած է, որ կը մերժեն Ղարաբաղի մէջ ապրող հայերուն վերաբերեալ քննարկում որեւէ երկրի, այդ շարքին` Հայաստանի հետ: Ընդգծած է, որ Պաքուն պատրաստ է ոչ-պաշտօնական շփումներու, այն ալ` ոչ թէ պաշտօնական Ստեփանակերտի, այլ` «հայկական բնակչութեան ներկայացուցիչներուն հետ», բայց` ոչ աւելին: «Ղարաբաղի բնակիչները Ատրպէյճանի քաղաքացիներ են, եւ անոր որ հաճելի չի թուիր, կրնայ հեռանալ, այլ տարբերակ չկայ», յաւելած է ան:
«Մենք կը նախատեսենք շարունակել ոչ-պաշտօնական հանդիպումները Ղարաբաղի հայկական բնակչութեան հետ: Այդպիսի շփումներ արդէն իսկ կ’ընթանան որոշակի ժամանակ, եւ կը կարծեմ, թէ անոնք պիտի բերեն լիակատար փոխըմբռնման ռուսական խաղաղապահ առաքելութեան տեղակայման գօտիին մէջ ապրող բնակչութեան մեծամասնութեան հետ: Ատրպէյճանական հասարակութեան մէջ համարկուելէ բացի այլ տարբերակ ուղղակի չկայ: Ով կ’ընդունի, որ պէտք է ապրիլ որպէս Ատրպէյճանի քաղաքացի, կը կարծեմ` չի զղջար, իսկ եթէ ինչ-որ մէկուն ինչ-որ պատճառով այդ յարմար չէ, կրնան իրենց համար բնակութեան այլ վայր ընտրել», յայտարարած է Ատրպէյճանի նախագահը:
