Հայաստանի վարչապետ Նիկոլ Փաշինեանի, Ատրպէյճանի նախագահ Իլհամ Ալիեւի, Ֆրանսայի նախագահ Էմանուէլ Մաքրոնի եւ Եւրոխորհուրդի նախագահ Շարլ Միշէլի` 2022 թուականի Հոկտեմբեր 6-ին կայացած հանդիպման արդիւնքով ընդունուած է յայտարարութիւն: Համատեղ յայտարարութեան մէջ, մասնաւորապէս, ըսուած է.
«Հայաստանն ու Ատրպէյճանը հաստատեցին իրենց յանձնառութիւնը ՄԱԿ-ի կանոնադրութեան եւ 1991 թուականի Ալմա-աթայի Հռչակագրին, որոնց միջոցով երկու կողմերն ալ կը ճանչնան միմեանց տարածքային ամբողջականութիւնն ու ինքնիշխանութիւնը: Անոնք հաստատեցին, որ այդ հիմք պիտի հանդիսանայ սահմանազատման հարցերով յանձնաժողովներու աշխատանքներուն համար, եւ որ այդ յանձնաժողովներու յաջորդ նիստը պիտի կայանայ Պրիւքսէլի մէջ, մինչեւ Հոկտեմբերի վերջ:
Հայաստանը իր համաձայնութիւնը յայտնեց` խրախուսելու ԵՄ քաղաքացիական առաքելութիւնը Ատրպէյճանի հետ սահմանի երկայնքով: Ատրպէյճանը համաձայնեցաւ համագործակցիլ նշեալ առաքելութեան հետ այնքանով, որքանով որ առնչութիւն կ’ունենայ: Առաքելութիւնը իր աշխատանքները պիտի սկսի Հոկտեմբերին` առաւելագոյնը երկու ամիս ժամկէտով: Առաքելութեան նպատակը պիտի ըլլայ վստահութեան կառուցումը, եւ իր զեկոյցներուն միջոցով, սահմանային յանձնաժողովներուն աջակցիլը»:
Հայաստանի Հանրապետութեան վարչապետ Նիկոլ Փաշինեանը եւ Ատրպէյճանի Հանրապետութեան նախագահ Իլհամ Ալիեւը հանդիպած են 2022 թուականի Հոկտեմբեր 6-ին Փրակի մէջ` Ֆրանսայի Հանրապետութեան նախագահին եւ Եւրոպական Խորհուրդի նախագահին նախաձեռնութեամբ կայացած «Եւրոպական Քաղաքական Համայնք»ի առաջին հանդիպման ծիրին մէջ: