Շփման գիծի լարուածութեան լոյսին տակ երէկ Ստեփանակերտը յայտնեց, որ Պաքուն պահանջած է Արցախ-Հայաստան երթեւեկութիւնը նոր երթուղիով կազմակերպել: Թէ ի՞նչ ժամկէտներու մէջ ու արդեօք հայկական կողմը համաձա՞յն է ատրպէյճանական կողմի պահանջին, չէր յստակացուած: Արցախի նախագահականէն ալ չպարզաբանեցին: Արայիկ Յարութիւնեանի մամուլի քարտուղար Լուսինէ Աւանեսեան «Ազատութեան» յայտնեց, որ աւելի ուշ պիտի մեկնաբանեն:
Պաքուի պահանջին անդարդարձած էր Հայաստանի Անվտանգութեան Խորհուրդի քարտուղարը: Արմէն Գրիգորեանը «Արմենփրես»-ի հետ հարցարզոյցին յայտարարած է, որ Արցախը Հայաստանի հետ կապող երթեւեկութիւնը Լաչինի միջանցքի փոխարէն այլ երթուղիով կազմակերպելու Ատրպէյճանի պահանջը օրինական չէ:
Հայաստանցի պաշտօնեան վկայակոչելած է 2020-ի Փաշինեան-Փութին-Ալիեւ եռակողմ յայտարարութեան 6-րդ կէտը, ուր սահմանուած են Լեռնային Ղարաբաղը Հայաստանին կապող Լաչինի միջանցքի ստեղծման եւ գործունէութեան հետ կապուած հարցերը: Արմէն Գրիգորեանը նշած է. «Կողմերի համաձայնեցմամբ յառաջիկայ երեք տարուայ ընթացքում կ’որոշուի Հայաստանի հետ Լեռնային Ղարաբաղի կապն ապահովող Լաչինի միջանցքով երթեւեկութեան նոր երթուղու կառուցման ծրագիրը, ռուսական խաղաղապահներու հետագայ վերաբաշխմամբ` այդ երթուղու պահպանութեան համար»:
Գրիգորեան շեշտած է, որ այս պահի դրութեամբ համաձայնեցուած ծրագիր գոյութիւն չունի, թէեւ, ըստ Հայաստանի անվտանգութեան քարտուղարին, այս ուղղութեամբ որոշակի աշխատանք կատարուած է
«Յամենայնդէպս` Հայաստանը որեւէ ծրագրի համաձայնութիւն չի տուել, հետեւաբար Ատրպէյճանի պահանջը օրինական չէ», ըսած է Անվտանգութեան Խորհուրդի քարտուղարը` նշելով, որ Հայաստանը արդէն իսկ առաջարկած է եռակողմ ձեւաչափով համաձայնեցնել եւ ստորագրել ծրագիրը եւ համաձայնեցուած ժամանակացոյցով ու ճանապարհային քարտէզով երթալ յառաջ:
«Դա այն է, ինչ նախատեսուած է 2020 թուականի Նոյեմբերի 9-ի եռակողմ յայտարարութեամբ», ըսած է ԱԽ քարտուղարը` չյստակացնելով, թէ Հայաստանի առաջարկած ժամանակացոյցը ինչ ժամկէտներ կ’ենթադրէ: