Եւրոպական Միութեան յատուկ ներկայացուցիչ՝ Թոյվօ Քլաարը Հայաստանի վարչապետ՝ Նիկոլ Փաշինեանի հետ հանդիպման ընթացքին յայտնած է Եւրոպական միութեան պատրաստակամութիւնը օժանդակելու տարածաշրջանի վստահութեան եւ երկխօսութեան մթնոլորտի հաստատման գործընթացին։
Անդրադառնալով ԼՂ-ի հակամարտութեան կարգաւորման խնդիրին եւ տարածաշրջանային նշանակութիւն ունեցող շարք մը հարցերու՝ զրուցակիցները կարեւորած են ԵԱՀԿ Մինսքի խումբի համանախագահութեան ծիրէն ներս բանակցային գործընթացի վերսկսումը:
ԵՄ-ի յատուկ ներկայացուցիչը նշած է, որ ԵՄ-ը յանձնառու է խորացնելու գործընկերութիւնը Հայաստանի հետ:
Հայաստանի վարչապետը եւ ԵՄ-ի յատուկ ներկայացուցիչը մտքեր փոխանակած են երկկողմանի յարաբերութիւններու օրակարգի շուրջ: Քննարկուած են տարբեր ձեւաչափերով, ներառեալ Արեւելեան գործընկերութեան ծրագրի ծիրէն ներս փոխգործակցութեան խթանման հեռանկարները:
ԵՄ-ի յատուկ ներկայացուցիչը Հոկտեմբեր 19-ին Պաքուի մէջ հանդիպած է Ատրպէյճանի նախագահ Իլհամ Ալիեւի հետ։