Եռաբլուր զինուորական պանթէոնի մէջ, ՀՀ նախագահ՝ Արմէն Սարգսեան, ՀՀ Ազգային ժողովի նախագահ՝ Արարատ Միրզոյեան յարգանքի տուրք մատուցած են 2016-ի Ապրիլ 2-ին մեկնարկած քառօրեայ պատերազմին, ինչպէս նաեւ 2020-ի 44-օրեայ պատերազմի նահատակներու յիշատակին: Վարչապետ Նիկոլ Փաշինեանի անունով Եռաբլուրին մէջ ծաղիկներ դրուած են Ապրիլեան քառօրեայ պատերազմի հերոսներու շիրիմներուն եւ ծաղկեպսակ՝ զոհուած ազատամարտիկներու յիշատակը յաւերժացնող յուշահամալիրին:
ՀՀ պաշտպանութեան նախարար՝ Վաղարշակ Յարութիւնեանի եւ Հայաստանի Զինուած ուժերու գլխաւոր շտաբի պետ՝ Արտակ Դաւթեանի գլխաւորութեամբ Ապրիլ 2-ին Եռաբլուր պանթէոն այցելած են նաեւ բարձրագոյն սպայակազմը:
«Այսօր ողբում ենք ու հպարտանում ենք մեր քաջարի զինծառայողներով, ովքեր, կատարելով իրենց առջեւ դրուած խնդիրը, նահատակուեցին յանուն Հայրենիքի թէ 2016 թուականի քառօրեայ, թէ վերջին 44-օրեայ պատերազմի ընթացքում: Եթէ Ապրիլեան պատերազմից դասեր քաղած չլինէինք, ապա վերջին 44-օրեայ պատերազմն այլ ելք կ’ունենար: Մենք կարող էինք Արցախն ամբողջութեամբ կորցնել»,- «Արմէնփրէս»-ի հաղորդմամբ, լրագրողներու հետ զրոյցի ընթացքին նշեց Արտակ Դաւթեան:
Յիշեցնենք, որ Ապրիլ 1-ին լոյս 2-ի գիշերը ատրպէյճանական կողմը, կոպտօրէն ոտնահարելով հրադադարի մասին 1994-ի Մայիս 12-ի եւ միջադէպերու կարգաւորման մասին 1995-ի Փետրուար 6-ի համաձայնագիրները, լայնամաշապ յարձակում նախաձեռնեց Լեռնային Ղարաբաղի Հանրապետութեան եւ Ատրպէյճանի զինուած ուժերու շփման գիծի ողջ երկայնքով՝ ծանր սարքաւորումներու, հրետանիի եւ ռազմական օդուժի կիրառմամբ։
Առճակատումը տեւեց Ապրիլ 2-էն 5-ը։ Առաւել թէժ մարտեր ընթացած են արցախա-ատրպէյճանական շփման գիծի հարաւային (Հադրութ) եւ հիւսիսարեւելեան (Մարտակերտ) ուղղութիւններուն։ Ապրիլի ընթացքին հայկական զինուած ուժերէն մարտական գործողութիւններու հետեւանքով զոհուած է աւելի քան 100 զինծառայող: