Հայաստանի Հանրապետութեան արտաքին գործոց նախարարութիւնը յայտարարութիւն տարածած է, Արցախի դէմ Ատրպէյճանի ռազմական յարձակողականի 2016-ի Ապրիլի հինգերորդ տարելիցի կապակցութեամբ: «Արմէնփրէս»-ը կը ներկայացնէ ՀՀ ԱԳՆ յայտարարութիւնը.
«Հինգ տարի առաջ՝ 2016 թ. Ապրիլի 1-ի լոյս 2-ի գիշերը, ատրպէյճանական իշխանութիւնները, կոպտօրէն խախտելով հրադադարի պահպանման յանձնառութիւնը՝ լայնածաւալ ռազմական յարձակում սանձազերծեցին Արցախի դէմ՝ փորձելով ուժի կիրառման միջոցով լուծել ղարաբաղեան հակամարտութիւնը:
Յարձակողական գործողութիւնների ընթացքում ատրպէյճանական զինուած ուժերը կանխամտածուած թիրախաւորում էին նաեւ քաղաքացիական բնակավայրերն ու ենթակառուցուածքները: Արցախի դէմ քառօրեայ պատերազմն ուղեկցւում էր Արցախի զինծառայողների եւ քաղաքացիական անձանց դաժան սպանութիւններով, խոշտանգումներով, ինչպէս նաեւ զոհուածների մարմինների անարգմամբ: Ազգային ատելութեան հիմքով այդ յանցագործութիւններն իրագործողները հետագայում պարգեւատրուեցին Ատրպէյճանի իշխանութիւնների կողմից` ամենաբարձր մակարդակով:
Ապրիլեան պատերազմին յաջորդած տարիներին, ոգեւորուած իրագործուած պատերազմական յանցագործութիւնների եւ մարդու իրաւունքների ոտնահարումների անպատժելիութեամբ, ատրպէյճանական իշխանութիւներն աւելի սաստկացրեցին ռազմատենչ հռետորաբանութիւնն ու հայերի նկատմամբ ատելութեան քարոզը:
Այս քաղաքականութեան իրականացման արդիւնքը դարձաւ 2020թ. Թուրքիայի եւ վերջինիս կողմից հովանաւորուող օտարերկրեայ զինեալ ահաբեկիչների անմիջական մասնակցութեամբ Ատրպէյճանի կողմից Արցախի դէմ նոր ռազմական յարձակման սանձազերծումը, որը յանգեցրեց բազմաթիւ անդառնալի մարդկային եւ նիւթական կորուստների: Ատրպէյճանի ռազմական բռնագրաւումի ներքոյ անցաւ Արցախի տարածքի զգալի մասը, տասնեակ հազարաւոր քաղաքացիներ դարձան փախստական:
2016թ. Ապրիլին եւ 2020թ. Սեպտեմբերին Արցախի դէմ սանձազերծուած լայնածաւալ պատերազմներն ու դրանց ընթացքում Ատրպէյճանի կողմից իրագործուած պատերազմական յանցագործութիւնները ցոյց տուեցին, որ Արցախը որեւէ կարգավիճակով չի կարող լինել Ատրպէյճանի իրաւասութեան ներքոյ:
Միայն Արցախի դէմ ատրպէյճանական յարձակման հետեւանքների հասցէագրումը, Արցախի կարգավիճակի որոշումը կարող են հիմք հանդիսանալ տարածաշրջանում ամուր խաղաղութեան եւ կայունութեան համար: Հայաստանը եւ հայ ժողովուրդը գործադրելու են հնարաւոր բոլոր ջանքերը՝ լիարժէքօրէն վերականգնելու Արցախի մեր հայրենակիցների բոլոր իրաւունքները՝ իրենց պատմական հայրենիքում ազատ եւ արժանապատիւ կենսագործունէութեան համար:
