«Քորոնա» ժահրի հաստատուած դէպքերու թիւը վերջին օրուայ ընթացքին աւելցած է 469-ով՝ հասնելով 36162-ի։ Դրական եղած է կատարուած 1981 հետազօտութիւններու 23,6 տոկոսը։
«Նրանցից 25 հազար 244-ն արդէն առողջացել են, 688-ը՝ մահուան ելքով», – ըսաւ Առողջապահութեան նախարարութեան մամլոյ քարտուղար՝ Ալինա Նիկողոսեան:
Նիկողոսեան յայտնեց, որ հիւանդութիւնը յաղթահարողներու թիւը երէկ աւելցած է 478-ով, 10 մարդ մահացած է, մահացածները 73-էն 87 տարեկան էին։ Մինչեւ այսօր 217 մարդ ունենալով «Քորոնա» ժահր մահացած է այլ պատճառներով։ «Երէկուայ դրութեամբ չենք ունեցել մահեր, ովքեր որ ունեցել են վարակը, սակայն այլ պատճառով է մահը վրայ հասել», – նշեց Նիկողոսեան: – «Մենք ամէն առաւօտեան ժամը 9-ի դրութեամբ ունենում ենք նախորդ օրուայ դրական դէպքերի հիւանդանոցի կարիք ունեցողների թիւը: Ժամը 9-ի դրութեամբ դեռ տանը սպասող հիւանդներ, այդ թուում նաեւ կեդրոններում, չունենք»:
Եթէ շաբաթներ առաջ Covid-19 կը հաստատուէր հետազօտուողներու աւելի քան 30 տոկոսի մօտ, ապա վերջին շրջանին այս յարաբերակցութիւնը կը տատանուի 22-էն 26 տոկոսի սահմաններուն։ Առողջացածներուն թիւն ալ վերջին շաբաթներուն կը գերազանցէ օրական հաստատուած դէպքերու թիւին։
Երէկ՝ Յուլիս 22-ին, վարչապետ Նիկոլ Փաշինեան յայտարարեց, թէ Հայաստանը կը մտնէ «Քորոնա» ժահրի ճգնաժամի յաղթահարման փուլ՝ ընդգծելով, որ լարուածութեան թուլացումը առաջին հերթին դիմակներ կրելու արդիւնք է, սակայն, ըստ վարչապետին, կանոնները չկատարելու պարագային իրավիճակը կրնայ նորէն վատթարանալ. – «Սա ասում եմ, որովհետեւ Հայաստանում շարունակուում է որոշակի շրջանակների կողմից քարոզուել համաճարակը ընդլայնելուն միտուած գործողութիւններ, մասնաւորապէս դիմակների հետ կապուած»:
Տնտեսութիւնը, ըստ Արդիւնաբերողներու եւ գործարարներու միութեան նախագահ՝ Արսէն Ղազարեանին, համավարակի ալիքէն յետոյ ստեղծուած անկումէն դուրս եկած է. – «Մենք վերականգնման փուլի սկիզբն ենք մտել»:
Ղազարեանի խօսքով՝ «Քորոնա» ժահրի հարուածի տակէն դեռ դուրս չեն ելած զբօսաշրջութեան եւ հանրային սնունդի ոլորտները. – «Վարչապետը նաեւ ընդգծեց, որ պատահական չէր, որ մենք քարանթինից մի փոքր շուտ դուրս եկանք, որովհետեւ մենք պատկերացնում ենք տնտեսական հետեւանքները»:
Երէկ «Քորոնա» ժահրի 4 նոր դէպք հաստատուած է Լեռնային Ղարաբաղի մէջ, յայտնած է Արցախի առողջապահութեան նախարարութիւնը։ Մինչեւ այժմ Ղարաբաղի մէջ Covid-19 հաստատուած է 187 մարդու մօտ, 144-ը արդէն յաղթահարած է հիւանդութիւնը։ Ղարաբաղի մէջ «Քորոնա» ժահրի պատճառով մահուան դէպք դեռ չէ գրանցուած։
