Համացանցի միջոցով կը շարունակուին ոչ ճշգրիտ տեղեկութիւններ շրջանառուիլ, տարբեր պաշտօնեաներու երկիրը լքելու մասին: Խօսքը, այս անգամ, ՀՀ նախագահ Արմէն Սարգսեանի մասին է: Մամուլի մէջ տարածուած էին գրառումներ, թէ արտակարգ իրավիճակի պայմաններու մէջ վերջինս լքած է երկիրը:
Ըստ «Արմէնփրէս»-ին, տեղեկութիւնը ստուգելու համար, Տեղեկատուութեան ստուգման կեդրոնը կապ հաստատեց Հանրապետութեան նախագահի աշխատակազմի հետ, որոնք յայտնեցին, որ Արմէն Սարգսեան չէ լքած երկիրը եւ այժմ կը գտնուի իր աշխատասենեակը:
Օրեր շարունակ կը խօսուէր նաեւ այն մասին, թէ խուճապային տրամադրութիւններէն յետոյ Հայաստանը լքած է նաեւ Երեւանի քաղաքապետ Հայկ Մարութեանը: Այս լուրը նոյնպէս հերքուեցաւ: Քաղաքապետ Մարութեանը յայտնեց, որ 2020 թուականի ընթացքին երկրէն չէ բացակայած, իսկ վերջինիս երկքաղաքացի ըլլալու լուրը կեղծ է: Ան նաեւ հանդէս եկաւ ուղերձով մը արտակարգ դրութեան վերաբերեալ:
Յիշեցնենք, որ օրեր առաջ կը խօսուէր նաեւ, թէ Քաղաքացիական օդագնացութեան վարչութեան պետ Տաթեւիկ Ռեւազեանը Հայաստանի մէջ «Քորոնա» ժահրի տարածման պատճառով լքած է երկիրը ու տեղափոխուած Դանիա: Սակայն պարզուեցաւ, որ Տաթեւիկ Ռեւազեան, յղիութեան առիթով այժմ արձակուրդի մէջ է եւ մեկնած Դանիա ընտանիքին կողքին ըլլալու:
