Home ԳԼԽԱՒՈՐ ԼՈՒՐԵՐ Հայաստանի Մէջ Անկախ Իրաւապահ Մարմին Գոյութիւն Չունի

Հայաստանի Մէջ Անկախ Իրաւապահ Մարմին Գոյութիւն Չունի

by MassisPost

Հայաստանի մէջ գոյութիւն չունի անկախ իրաւապահ մարմին, որ ընտրակաշառքներու կամ հնչեղութիւն ստացած այլ գործերու վերաբերեալ կրնայ անկախ քննութիւն կատարել: Այսպիսի համոզմունք յայտնած է «Իրազեկ քաղաքացիների միաւորում» հասարակական կազմակերպութեան ներկայացուցիչ Դանիէլ Իոաննիսեանը «Ազատութեան» «Կիրակնօրեայ վերլուծական Հրայր Թամրազեանի հետ» հաղորդման ժամանակ:

Վերջերս տեղի ունեցած խորհրդարանական եւ Երեւանի աւագանիի ընտրութիւններու ընթացքին իշխող Հանրապետական կուսակցութիւնը (ՀՀԿ) մի քանի գայթակղութիւններու կեդրոնը յայտնուեցաւ՝ ձայներ հաւաքելու, ընտրակաշառքներու, ընտրողներու ուղղորդման հետ կապուած:

Խօսելով անոնցմէ մէկուն՝ «Զիպիլիքս»-ի մասին, (յիշեցնենք, ընդդիմադիր «Ելք» դաշինքը աղբամանի մէջ յայտնաբերած նիւթերը ներկայացուց Գլխաւոր դատախազութեան՝ հաղորդելով «յանցագործութեան» մասին), Իոաննիսեանը շեշտած է․ – «Զիպիլիքս»-ի պատմութիւնը առհասարակ բաւականին հետաքրքիր է ոչ միայն այն փաստերով, որոնք որ Հանրապետական կուսակցութեան թափած աղբից ի յայտ եկան, ջրի երես դուրս եկան, այլեւ նրանով, թէ ով է դա յայտնաբերել՝ դա յայտնաբերել են ընդդիմադիր կուսակցութեան աքթիւիսթները»:

«Առհասարակ հետաքրքիր իրավիճակ է ստեղծուել, որ կարծես թէ ընդդիմադիր կուսակցութիւնների աքթիւիսթները կամ քաղհասարակութիւնը իրենց վրայ վերցնում են իրաւապահների ֆունկցիաներ», – ըսած է Դանիէլ Իոաննիսեանը՝ շարունակելով․ – «Այստեղ հարց է առաջանում՝ իսկ ինչո՞ւ իրաւապահները որեւիցէ փրօաքթիւ գործողութիւն չեն կատարում, որպէսզի բացայայտեն նման դէպքերը, ինչո՞ւ են նման դէպքերը միշտ բացայայտւում քաղհասարակութեան կողմից կամ ընդդիմադիրների կողմից եւ ընդ որում շատ յաճախ իրաւապահների կողմից պատշաճ քննութեան առարկայ չեն դառնում»:

«Երբ ընդդիմադիրները տեսախցիկի վրայ նկարում են, թէ ինչպէս է քաղաքացին պատմում, որ ինքը ընտրակաշառք է վերցրել, ումից է վերցրել, ինչքան է վերցրել, որտեղ է վերցրել, երբ է վերցրել, ում հետ միասին է վերցրել, ինչի համար, այսինքն՝ բոլոր մանրամասներով, յետոյ այդ քաղաքացուն հրաւիրում են ոստիկանութիւն, այդ քաղաքացին ոստիկանութիւնից դուրս գալուց յետոյ յայտարարում է, որ ինքը որեւիցէ ընտրակաշառք չի վերցրել, եւ այսպիսի դէպքը մէկը չէ՝ այս պահին ես առնուազն երեք այդպիսի դէպք յիշում եմ վերջին ժամանակաշրջանում, սա նշանակում է, որ իրաւապահները իրենք կոծկում են գործը: Այսինքն՝ անգամ այն գործը, որը քաղհասարակութիւնը բացայայտում է, այսինքն՝ անում է մի բան, ինչը ի սկզբանէ պէտք է իրաւապահները անէին, բայց անգամ երբ արդէն գործը ծամած տալիս են իրաւապահներին, անգամ այդ դէպքերում իրաւապահները գործը «սպանում են», – շեշտած է Իրազեկ քաղաքացիներու միաւորման ներկայացուցիչը:

Հարակից Նյութեր

Leave a Comment