Ատրպէյճանի նախագահ Իլհամ Ալիեւ կառավարութեան նիստի ժամանակ յայտարարած է թէ Ղարաբաղեան հարցի լուծման ուղղուած բանակցային գործընթացը պիտի վերսկսի առանց որեւէ նախապայմանի:
«Հայաստան տարբեր տեսակի նախապայմաններ առաջ մղելով կը փորձէր խափանել բանակցութիւններու վերսկսումը, բայց այժմ ստիպուած է հրաժարիլ այդ քաղաքականութենէն»,- աւելցուցած է Ատրպէյճանի ղեկավարը:
Պատասխանելով Ալիեւի այս յայտարարութեան Հայաստանի նախագահի մամլոյ քարտուղարը բաւական խիստ լեզուով հակադարձեց այդ խօսքերուն:
«Բոլորին շատոնց յայտնի է, որ բարձր մակարդակի հանդիպումներէ առաջ Ատրպէյճանի ղեկավարութիւնը կը դիմէ սադրանքներու, փորձելով պղտորել մթնոլորտը», ըսած է նախագահի մամլոյ քարտուղար Վլատիմիր Յակոբեան, պատասխանելով NEWS.am-ի հարցին, թէ ինչպէ՞ս կը գնահատէ «Բաղրամեան 26»ը Ատրպէյճանի նախագահին կողմէ Ատրպէյճանի նախարարներու խորհուրդի նիստի ժամանակ հնչած յայտարարութիւնները ԼՂ հարցին վերաբերեալ:
«Վերջին յայտարարութիւնները այդ շարքից էին. միակ տարբերութեամբ, որ այդ սադրանքն իրականացուել է Պաքուի կենտրոնում, այլ ոչ թէ Արցախի հետ շփման գծում կամ Հայաստանի հետ սահմանին», ըսած է Յակոբեան:
«ԵԱՀԿ Մինսկի խմբի համանախագահ երկրների նախաձեռնութեամբ Հայաստանի եւ Ատրպէյճանի ղեկավարների հանդիպումից օրեր առաջ Ատրպէյճանը փորձում է պատրանք ստեղծել, թէ բանակցութիւններին ինքը թելադրողի դիրքերից է հանդէս գալիս: Պաքուի հաշուարկները պարզունակ են` խուսափել նախորդ գագաթնաժողովներին ձեռք բերուած պայմանաւորուածութիւնները չկատարելու պատասխանատուութիւնից. առաջին հերթին Ատրպէյճանի ժողովրդի առջեւ:
«Մեր եւ Պաքուի պատկերացումները խայտառակութեան մասին խիստ տարբերւում են: Գուցէ Ատրպէյճանում չգիտեն, բայց մեր տարածաշրջանում հնուց ի վեր խայտառակութիւն է համարուել նախապէս ձեռք բերուած պայմանաւորուածութիւնների հետ կանգնելը: Խայտառակութիւն է, երբ միջազգային ասպարէզում այլ պետութիւնների ղեկավարների ներկայութեամբ ասածն ու սեփական պատերի ներսում ասածը չեն համապատասխանում իրար: Խայտառակութիւն է, երբ փորձում են միջազգային հանրութեանը եւ սեփական ժողովրդին խաբել:
«Բանակցութիւնների գնալու հայկական կողմի համաձայնութիւնը որեւէ կերպ չի նշանակում մեր դիրքորոշման փոփոխութիւն ԼՂ կարգաւորման հարցում կամ ետքայլ Վիեննայի եւ Սանկտ Փեթերպուրկի գագաթնաժողովների պայմանաւորուածութիւնների կատարման հրամայականից:
«Եթէ միջազգային այդ պայմանաւորուածութիւնների կատարումն է Ատրպէյճանը համարում մեր կողմից առաջ քաշուած նախապայման, ապա բոլորը գիտեն, թէ ինչ են այս կապակցութեամբ բազմիցս յայտարարել ԵԱՀԿ Մինսկի խմբի համանախագահ երկրները, եւ նրանք վստահաբար դեռ ասելիք ունեն:
«Զաւեշտ է, որ միջազգային հանրութեան առջեւ խայտառակուելուց խօսում է մի երկիր, որի նախաձեռնութեամբ ստեղծուած միջազգային պաշտօնեաներին կաշառելու այսպէս կոչուած բարեգործական հիմնադրամի մասին փաստերը չեն իջնում միջազգային մամուլի առաջին էջերից: Թերեւս Ատրպէյճանի այդ խայտառակութիւնը կոծկելու այլ ճանապարհ չի մնացել, քան ինչ-որ մտացածին յաղթանակների մասին գլուխ գովելը: Մէկ անգամ չէ, որ Ատրպէյճանի տարբեր նախագահների յոխորտանքները յօդս են ցնդել` բախուելով Արցախի ժողովրդի անբեկանելի կամքին եւ կայացած Արցախի Հանրապետութեան իրողութեանը: Յստակ է, որ մեզ հունից հանելու փորձերը ի սկզբանէ ձախողուած են: Մենք յանձնառու ենք ղարաբաղեան հիմնախնդիրը կարգաւորել բացառապէս խաղաղ միջոցներով»,- ըսած է Վլատիմիր Յակոբեան, ներկայացնելով նախագահական պալատի դիրքորոշումը:
