ՀՀ նախագահ Վահագն Խաչատուրեան շնորհաւորական ուղերձ յղած է Աշխատանքի օրուան առիթով, որուն մէջ ըսուած է․
«Սիրելի հայրենակիցներ,
Յարգելի աշխատաւորներ,
Ջերմօրէն շնորհաւորում եմ բոլորիդ Մայիսի 1-ի՝ Աշխատանքի եւ աշխատաւորի միջազգային օրուայ կապակցութեամբ: Այս օրը մեզ հնարաւորութիւն է տալիս գնահատելու եւ արժեւորելու աշխատանքի դերը մեր կեանքում, հասարակութեան զարգացման մէջ եւ պետականութեան ամրապնդման գործում:
Աշխատանքն այն հիմնաքարն է, որի վրայ կառուցւում է ինչպէս մեր անձնական, ընտանեկան բարեկեցութիւնը, այնպէս էլ պետութեան յառաջընթացն ու բարգաւաճումը: Մեր ժողովուրդը դարեր շարունակ աչքի է ընկել իր աշխատասիրութեամբ, ստեղծագործական մօտեցմամբ եւ նուիրուածութեամբ:
Մեր պատմութիւնը լի է օրինակներով, թէ ինչպէս ենք յաղթահարել դժուարութիւնները եւ ստեղծել նոր արժէքներ՝ շնորհիւ մեր քրտնաջան աշխատանքի: Այսօր էլ, մեր քաղաքացիները նուիրումով աշխատում են՝ իրենց ներդրումն ունենալով երկրի զարգացման գործում:
Մայիսի 1-ը յարմար առիթ է նաեւ գնահատելու մեր ձեռքբերումները եւ ուրուագծելու ապագայ զարգացման ուղիները: Մենք պարտաւոր ենք ստեղծել այնպիսի պայմաններ, որտեղ իւրաքանչիւր քաղաքացի կարող է իրացնել իր ներուժը, ստանալ արդար վարձատրութիւն եւ աշխատել արժանապատիւ պայմաններում:
Շնորհակալութիւն եմ յայտնում բոլոր աշխատաւորներին, ովքեր իրենց ամէնօրեայ աշխատանքով նպաստում են մեր երկրի զարգացմանը: Յատուկ երախտագիտութիւն եմ յայտնում նաեւ բոլոր այն մարդկանց, ովքեր դժուարին պայմաններում շարունակում են բարեխղճօրէն կատարել իրենց աշխատանքային պարտականութիւնները:
Կրկին շնորհաւորում եմ բոլորիս մայիսմէկեան տօնի կապակցութեամբ եւ մաղթում առողջութիւն, բարեկեցութիւն եւ նոր յաջողութիւններ»:
