Ալպանիոյ Տուրէս քաղաքին մէջ ընթացող ծանրամարտի Եւրոպայի երիտասարդներու եւ մինչեւ 23 տարեկաններու առաջնութեան Հայաստանի հաւաքականը յաջող ելոյթներ կ՚ունենայ՝ նուաճելով երկու ոսկէ եւ մէկ պրոնզէ մետալ երկամարտի ընդհանուր արդիւնքներով, ինչպէս նաեւ ոսկէ մետալներ՝ առանձին վարժութիւններուն մէջ։
Կիներու մինչեւ 23 տարեկաններու 57 քկ. ծանրութեան դասակարգին մէջ Ալեքսանտրա Գրիգորեան հռչակուած է Եւրոպայի ախոյեան՝ երկամարտի 202 քկ. ընդհանուր արդիւնքով։ Հայ մարզուհին ոսկէ մետալներ նուաճած է նաեւ երկու առանձին վարժութիւններուն մէջ՝ պոկումին բարձրացնելով 90 քկ., իսկ հրումին՝ 112 քկ. ծանրաձող։
Երիտասարդներու 75 քկ. ծանրութեան դասակարգին մէջ Նարեկ Գրիգորեան եւս հռչակուած է Եւրոպայի ախոյեան՝ երկամարտի 322 քկ. ընդհանուր արդիւնքով։ Պոկում վարժութեան ընթացքին ան յաջողութեամբ կատարած է իր երեք մօտեցումները՝ բարձրացնելով 140, 144 եւ 146 քկ. ծանրաձողերը եւ նուաճելով փոքր ոսկէ մետալը։ Հրում վարժութեան մէջ հայ ծանրորդը բարձրացուցած է 170 եւ 176 քկ.՝ արժանանալով երկրորդ փոքր ոսկէ մետալին։ Երկամարտի ընդհանուր արդիւնքով Նարեկ Գրիգորեան գրաւած է պատուոյ պատուանդանին առաջին աստիճանը։
Նոյն ծանրութեան դասակարգին մէջ Հայաստանի հաւաքականի անդամ Յովհաննէս Յովհաննիսեան գրաւած է չորրորդ դիրքը՝ երկամարտի 299 քկ. արդիւնքով։ Ան պոկում վարժութեան մէջ բարձրացուցած է 130 եւ 136 քկ., իսկ հրումին՝ 165 քկ. ծանրաձող։
Մինչեւ 23 տարեկաններու 60 քկ. ծանրութեան դասակարգին մէջ Հայաստանի ներկայացուցիչ, Բաղրամեան համայնքէն Սէյրան Խուդանեան նուաճած է Եւրոպայի առաջնութեան պրոնզէ մետալը՝ երկամարտի 256 քկ. ընդհանուր արդիւնքով։
Խուդանեան պոկում վարժութեան մէջ յաջողութեամբ բարձրացուցած է 110, 114 եւ 117 քկ. ծանրաձողերը, իսկ հրումին՝ 135 եւ 139 քկ.։ Վերջին վարժութեան մէջ ան գրաւած է երրորդ դիրքը՝ արժանանալով նաեւ փոքր պրոնզէ մետալի։
Այսպիսով, Հայաստանի երիտասարդ եւ մինչեւ 23 տարեկան ծանրորդները յաջող մեկնարկ արձանագրած են Եւրոպայի առաջնութեան՝ երկամարտի մէջ նուաճելով երկու ոսկէ եւ մէկ պրոնզէ մետալ եւ անգամ մը եւս հաստատելով հայկական ծանրամարտի մրցունակութիւնը միջազգային մարզաբեմին վրայ։
