Հարաւային Կովկասի մէջ խաղաղութեան հաստատման գործընթացը կը գտնուի ԱՄՆ պետական քարտուղարի ուշադրութեան կեդրոնին: Այս մասին յայտնած է ԱՄՆ Պետական Քարտուղարութեան խօսնակի տեղակալ Վետանթ Փաթելը լրագրողներու հետ ճեպազրոյցի ընթացքին:
«Այս վարչակազմը, մենք կը շարունակենք աշխատիլ Հարաւային Կովկասի մէջ խաղաղութեան ուղղութեամբ: Անոր վրայ բաւական կեդրոնացած է նաեւ անձամբ պետական քարտուղարը: Եւ հետեւաբար, մենք կ’ողջունենք որեւէ ջանք, որ մեզ կ’օգնէ հասնելու կայուն խաղաղութեան», ըսած է Փաթել:
Դիւանագէտին նաեւ հարց ուղղած են` արդեօ՞ք կովկասեան բանակցութիւններու հարցերով աւագ խորհրդական Լուիս Պոնոն, որ տուեալ պաշտօնին նշանակուած է արդէն աւելի քան երկու շաբաթ առաջ, չի պատրաստուիր մեկնելու տարածաշրջան: Դիւանագէտը նշած է, որ անոր այցին համար խոչընդոտներ չկան, սակայն ճամբորդութիւններու ծրագիրներուն մասին առայժմ տեղեկութիւններ չկան:
