Ռուսաստանը պաշտօնական ծանուցում ստացած է, որ Հայաստանի վարչապետ Նիկոլ Փաշինեան պիտի չմասնակցի Եւրասիական Տնտեսական Միութեան (ԵԱՏՄ) յառաջիկայ գագաթաժողովին: Այս մասին յայտնած է ՌԴ ԱԳՆ պաշտօնական ներկայացուցիչ Մարիա Զախարովան: Ըստ անոր՝ Մոսկուայի համար խնդիրը ոչ թէ անոր բացակայութիւնն է, այլ այդ քայլերուն համակարգային բնոյթը:
Հայաստանի կառավարութեան ղեկավարը պիտի բացակայի Մայիս 28-29-ին Ասթանայի մէջ կայանալիք ԵԱՏՄ գագաթաժողովը։ Անոր պիտի փոխարինէ փոխվարչապետ Մհեր Գրիգորեանը։
Զախարովայի ձեւակերպմամբ՝ Փաշինեանի բացակայութիւնը ողբերգութիւն չէ միաւորման համար: «Միութեան համար ողբերգութիւն չկայ։ Խնդիրը Հայաստանն է»,- նշած է ան։
Դիւանագէտը նշած է, որ անհնար է համատեղել անդամակցութիւնը ԵԱՏՄ-ին եւ մէկ այլ խմբաւորման վերազգային մեխանիզմներու ներդրումը։ Անոր խօսքով՝ Եւրըմիութեան կառոյցները կործանարար քաղաքականութիւն կը վարեն եւ
պատժամիջոցներ կը կիրառեն ԵԱՏՄ անդամներուն դէմ:
«Սա լիակատար հակասութիւն է, ոչ թէ այն պատճառով, որ մենք դէմ ենք փոխգործակցութեան տարբեր ձեւերու համատեղման։ Ընդհակառակը, մենք միշտ ըսած ենք, որ հնարաւոր է օրկանապէս համատեղել համագործակցութիւնը տարբեր
ոլորտներու մէջ։ Բայց ատիկա հնարաւոր էր մինչեւ Արեւմտեան Եւրոպայէն ուղիղ յարձակումներ սկսիլը, եւ մինչեւ այն վերածուեցաւ հիպրիտային պատերազմի, այդ շարքին՝ տնտեսական ոլորտին մէջ»,- ըսած է Զախարովան։
Ան յայտնած է, որ նախապէս եւս եղած են դէպքեր, երբ անդամ երկիրներու ներկայացուցիչները չեն մասնակցած նիստերուն, ինչ որ ցանկալի չէ, բայց կը պատահի: Սակայն, ըստ անոր, Փաշինեանի ներկայիս արտաքին քաղաքական ընթացքը վաղ թէ ուշ պիտի յանգեցնէ Պրիւքսէլի հակառուսական գիծին մէջ Երեւանի անդառնալի ներգրաւման, ինչ որ Հայաստանի համար պիտի ունենայ քաղաքական եւ տնտեսական հետեւանքներ։
