Հայաստանն ու Ատրպէյճանը չափաւոր քայլեր պիտի ձեռնարկեն 2025 թուականի շրջանակային խաղաղութեան համաձայնագրի դրոյթներու իրականացման ուղղութեամբ, ինչ որ պիտի նուազեցնէ անոնց միջեւ նոր պատերազմի վտանգը, կը գրէ Stratfor վերլուծական կեդրոնը:
Վերլուծական կեդրոնին գնահատմամբ՝ երկու երկիրներուն միջեւ առեւտուրի կարգաւորումը, հաւանաբար, պիտի ընթանայ զգուշօրէն. կողմերը վստահութիւն պիտի կառուցեն սահմանափակ առեւտրային փոխգործակցութեան, այլ ոչ թէ համապարփակ տնտեսական համարկման միջոցով:
Ներքին քաղաքականութեան մէջ Հայաստանի վարչապետ Նիկոլ Փաշինեան պիտի բախի հանրային դժգոհութեան սրման, որ հիմնականին մէջ պայմանաւորուած պիտի ըլլայ Ատրպէյճանին կատարուող ենթադրեալ զիջումներով եւ Հայ առաքելական եկեղեցւոյ հետ լարուած յարաբերութիւններով: Փաշինեանը, հաւանաբար, պիտի յետաձգէ սահմանադրական փոփոխութիւններու հանրաքուէի կայացումը մինչեւ յունիսեան ընտրութիւնները: Եթէ Փաշինեանը չվերընտրուի, խաղաղութեան համաձայնագրի նախագիծին ճակատագիրը պիտի դառնայ անորոշ: Սակայն, եթէ ան քուէարկութենէն յետոյ պահպանէ իշխանութիւնը, ապա, ամենայն հաւանականութեամբ, առաջնահերթութիւն պիտի դարձնէ «Թրամփի ուղիի» (TRIPP) իրագործումը, որ ԱՄՆ-ի եւ Ատրպէյճանի հետ ստորագրուած համատեղ հռչակագրի կեդրոնական մասն է:
Պաքուն, իր հերթին, պիտի աւարտէ Իրանի տարածքով անցնող Արաքսեան միջանցքի իր հատուածի շինարարութիւնը՝ TRIPP-ին զուգահեռ, միաժամանակ պահպանելով TRIPP-ը որպէս լծակ եւ այլընտրանք, որ Հայաստանը դուրս կը թողէ տարածաշրջանային համարկումէն՝ վերջինիս անհամագործակցութեան պարագային: Ռուսաստանը պիտի փորձէ խոչընդոտել TRIPP-ի զարգացումը, սակայն տարածաշրջանին մէջ անոր տկարացած դիրքը պիտի սահմանափակէ անոր կարողութիւնը զգալիօրէն խոչընդոտելու ինչպէս Երեւանի, այնպէս ալ Պաքուի դէպի Արեւմուտք շրջադարձը։
