ՀՀ վարչապետի աշխատակազմի ղեկավարի տեղակալ Տարօն Չախոյեանը ֆէյսպուքեան իր էջով գրած է.
«Տաւուշի մարզից Ատրպէյճանին տարածքները յանձնելու մասին Մայր Աթոռի յայտարարութիւնը սուտ է, ակնյայտ կեղծիք։
«Կաթողիկոսի կուսակցութիւնից մանիփուլիաթիւ յայտարարութիւններ են տարածում՝ մոլորեցնելով հանրութեանը։
«Ցաւում եմ, որ այս ծանր ժամանակաշրջանում սեփական ժողովրդին յուսադրելու ու առաջնորդելու փոխարէն հոգեւոր հայրերը ստանձնել են սեփական ժողովրդին ահաբեկելու ու մոլորեցնելու ուղին՝ ակնյայտ քաղաքական նպատակներով ապատեղեկատուութիւն տարածելով։
«Այն տարածքները, որոնց մասին բարձրաձայնում է Ատրպէյճանը, տէ իւրէ Հայաստանի տարածքում չեն եւ չեն եղել:
«Հայաստանի տարածքից ոչ ոք իրաւունք չունի եւ չի կարող անգամ 1 մեթր յանձնել կամ զիջել այլ պետութեան։
«Տաւուշի մարզից տարածքներ յանձնելու կամ զիջելու մասին բոլոր յայտարարութիւնները կեղծ են, իսկ այդ յայտարարութիւն տարածողները Հայաստանին նոր պատերազմի մէջ ներքաշելու նպատակ են հետապնդում, քանզի Հայաստանը տարածքային նկրտումներ չունի այլ պետութիւններից»։
«Վերջին շրջանի զարգացումները այլեւս կասկած չեն թողնում, որ Հայաստանի իշխանութիւնները Արցախի լիակատար հայաթափման եւ ՀՀ տարածքների բռնազաւթման պայմաններում, տեղի տալով Ատրպէյճանից հնչող սպառնալիքներին, պատրաստւում են վերջինիս յանձնել Տաւուշի մարզից տարածքներ նախքան ենթադրուող սահմանազատումն ու սահմանագծումը», յայտարարած էին Հայաստանի եպիսկոպոսներն ու թեմակալ առաջնորդները:
