Հայաստանի դիրքորոշումը այն է, որ «Զուարթնոց» միջազգային օդակայանին մէջ ծառայութիւնը ամբողջութեամբ պէտք է իրականացնեն Հայաստանի սահմանապահ զօրքերը։ Լրագրողներու հետ ճեպազրոյցին այս մասին ըսաւ Անվտանգութեան Խորհուրդի քարտուղար Արմէն Գրիգորեանը` պատասխանելով հարցումին, թէ արդեօ՞ք կը քննարկուի Ռուսիոյ սահմանապահները «Զուարթնոց» միջազգային օդակայանէն դուրս բերելու հարցը։
«Հայաստանը այս հարցում յստակ դիրքորոշում ունի եւ այդ յստակ դիրքորոշման մասին Ռուսաստանի Դաշնութեանը տեղեակ պահել է պաշտօնական նամակով։ Հայաստանի դիրքորոշումն այն է, որ «Զուարթնոց» միջազգային օդանաւակայանում ծառայութիւնը պէտք է իրականացնեն Հայաստանի սահմանապահ զօրքերը», ըսաւ Գրիգորեան։
«Զուարթնոց» օդակայանէն ռուս սահմանապահները դուրս բերելու մասին որոշում Հայաստանը չէ կայացուցած, Ռուսաստանին այդ մասին չեն յայտնած։ Այս մասին ըսած է Ռուսիոյ նախագահի մամուլի քարտուղար Տմիթրի Փեսքովը Սոչիի մէջ ընթացող Համաշխարհային երիտասարդական փառատօնին ժամանակ։
«Այդ առումով ինչ-որ որոշումներ, որքան մենք կը հասկնանք, չեն եղած: Պաշտօնական ուղիներով ոչ ոք մեզ հասցուցած է այդ որոշումները», ըսած է Փեսքով։
Ինչ կը վերաբերի հայ-ռուսական յարաբերութիւններուն, ան նշած է, որ Մոսկուան ունի քաղաքական կամք անոնց հետագայ կառուցման համար, իսկ ներկայիս դժուարութիւնները պիտի անցնին։
Ռուսաստանը բարձր կը գնահատէ Հայաստանի հետ յարաբերութիւններու առանձնայատուկ բնոյթը: «Երկիրներու յարաբերութիւններուն մէջ, ինչպէս մարդոց յարաբերութիւններուն մէջ, տարբեր փուլեր կ’ըլլան: Ամենամօտ հարեւանները կրնան ունենալ շրջան մը, երբ յարաբերութիւնները կը սրին: Բայց այստեղ կը պահանջուի քաղաքական կամք, մեր կողմէ այդ կայ», ըսած է մամուլի քարտուղարը։