«Առաջին յաղթանակն ենք գրանցել՝ սահմանագծման երեք քարերը չեն դրել այս պայքարի շնորհիւ»,- յայտարարեց Բագրատ սրբազանը՝ ելոյթ ունենալով Երեւանի Հանրապետութեան հրապարակին վրայ մեկնարկած հանրահաւաքին:
«Եկել ենք պատասխան պահանջելու Հայաստանի Հանրապետութեան կառավարութեան ղեկավարից, որ եկել է մեր համայնքներ ու դժբախտաբար ստել ու սպառնացել, եկել ենք պատասխան պահանջելու»,- ասաց Տաւուշի թեմի առաջնորդը՝ շարունակելով.- «Եկել ենք պահանջելու դադարեցնել այս միակողմանի ապօրինի գործընթացը: Դէմ չենք ո՛չ խաղաղութեանը, ո՛չ սահմանազատմանը, բայց այն, ինչ տեղի է ունենում, այժմ անընդունելի է»:
«Դո՛ւք էք պատերազմ հրահրողն ու պատերազմը կառավարելն անկարողը, նաեւ պատերազմ պայմանաւորուողը դուք էք»,- յայտարարեց Բագրատ սրբազանը՝ հեռակայ դիմելով իշխանութիւններուն:
«Մեր շարժումը չակնկալիքների պայքար է: Կայ երկու արժէք՝ հայրենիք եւ պատիւ»,- ըսաւ Տաւուշի թեմի առաջնորդը:
«Սուտը դարձել է մշակոյթ եւ պէտք է վերանայ ձեր միջոցով, սիրելի՛ ժողովուրդ: Մենք եկել ենք հաշտութեան մտքով: Թշնամութիւնը, ատելութիւնը, պառակտումը մեր տունը քանդել է, մարդիկ զրկուել են մարդ լինելու կերպարից: Մենք հաշտութեան օրակարգ ունենք եւ պէտք է իրականութիւն դարձնենք»,- յայտարարեց Բագրատ արքեպիսկոպոս Գալստանեանը:
«Այս կառավարութիւնը իրենց ղեկավարի գլխաւորութեամբ երկրի կառավարումը ծայրից ծայր ձախողել են, քանդել են ամբողջ անվտանգային համակարգը: Եկեղեցին առաջին օրուանից թիրախ է դարձել: Կեղծ խօսոյթ են բերել մեր կեանք՝ իրական Հայաստան-պատմական Հայաստան, Արարատ-Արագած: Արտաքին յարաբերութիւնների մէջ չկայ մի սեղան, որ Հայաստանն ասելիք ունենայ: Ամենակարեւորը՝ չկայ Արցախը»,- ըսաւ Տաւուշի թեմի առաջնորդը՝ շարունակելով.- «Հայրենիքը կորցնում են, յետոյ ասում են՝ իրական հայրենիքը պէտք է տեսնել, իրական հայրենիք էր Արցախը: Հայաստանի սահմանները այժմ քանի՞ քիլոմեթր է նուաճուած, որը չեն էլ պատրաստւում վերադարձել»:
«Նիկոլ Փաշինեան, մէկ ժամ ժամանակ ունէք հրաժարական ներկայացնելու»,- յայտարարեց Բագրատ սրբազանը:
«Պատրաստ եմ մէկ ժամուայ ընթացքում հանդիպելու եւ քննարկելու հեռանալու բոլոր պայմանաւորուածութիւնները: Դուք այլեւս իշխանութիւն չունէք, եւ Ձեր հրաժարականով կը վերադարձնէք հայոց Եռատօնը»,- ըսաւ Տաւուշի թեմի առաջնորդը:
«Հիմա մենք սպասենք արձագանքի: Ինքն է ասել՝ եթէ հրապարակը լցուի….»,- ընդգծեց Բագրատ սրբազանը:
