Ռուսաստանի Դաշնութեան Արտաքին գործերու նախարարութիւնը յայտարարութիւն տարածած է՝ մանրամասնութիւններ ներկայացնելով նախօրէին տեղի ունեցած Ռուսիոյ արտաքին գործերու նախարար Սերկէյ Լաւրովի եւ Հայաստանի արտաքին գործերու նախարար Արարատ Միրզոյեանի հեռախօսազրոյցէն:
«Արտաքին քաղաքական գերատեսչութիւններու ղեկավարները քննարկած են երկկողմ եւ տարածաշրջանային օրակարգի արդիական հարցերը, այդ շարքին՝ հայ-ատրպէյճանական կարգաւորման գործընթացը, ինչպէս նաեւ փոխգործակցութիւնը ընդհանուր համարկման միաւորումներու շրջանակին մէջ», նշուած է գերատեսչութեան հաղորդագրութեան մէջ։
Աւելի վաղ, Հայաստանի Արտաքին գործերու նախարարութիւնը յայտնած էր, որ ռուսական կողմին նախաձեռնութեամբ Մարտ 5-ին տեղի ունեցած է հեռախօսազրոյց Հայաստանի արտաքին գործերու նախարար Արարատ Միրզոյեանի եւ Ռուսիոյ արտաքին գործերու նախարար Սերկէյ Լաւրովի միջեւ:
ՀՀ ԱԳՆ հաղորդագրութեան համաձայն՝ զրուցակիցները քննարկած են երկկողմ եւ տարածաշրջանին վերաբերող հարցեր: