Արցախի պետական նախարար Գուրգէն Ներսիսեան իր ֆէյսպուքեան էջով գրած է․
«Այսօր Արցախի Հանրապետութեան Մարդու իրաւունքներու պաաշտպան Գեղամ Ստեփանեանի, ներքին գործերու նախարար Կարէն Սարգսեանի եւ Ազգային Ժողովի «Ազատ Հայրենիք-ՔՄԴ» խմբակցութեան ղեկավար Արթուր Յարութիւնեանի մասնակցութեամբ հանդիպել ենք Արցախում ռուսական խաղաղապահ ուժերի հրամանատար Ալեքսանտր Լէնցովի եւ այլ ներկայացուցիչների հետ: Մեր կողմից Ա. Լէնցովին է ներկայացուել Արցախում ստեղծուած իրավիճակը, Արցախում մեկնարկած համաժողովրդական շարժման մասնակիցների պահանջը: Ա. Լէնցովը յայտնել է, որ իրավիճակի վերաբերեալ պարբերաբար տեղեկութիւններ է փոխանցում Մոսկուա, ընդունել է, որ Արցախում մարդասիրական ճգնաժամ է, որը ամէն րոպէ խորանում է, արգելափակուած է Արցախը Հայաստանին միացնող ճանապարհը, խախտուած է Եռակողմ յայտարարութեան 6-րդ կէտը: Ա. Լէնցովը հաւաստիացրել է, որ իրավիճակի հետագայ զարգացումների վերաբերեալ տեղեկութիւնները այսուհետ վերադասին են փոխանցուելու անընդհատ եւ քայլեր են ձեռնարկուելու ծագած խնդիրները կարգաւորելու ուղղութեամբ:
«Ռուս խաղաղապահները պարտաւորուել են ամէնօրեայ, ամէնժամեայ ռեժիմով Արցախում տիրող իրավիճակը՝ տեղեկութիւնը, փոխանցել Ռուսաստանի Դաշնութեանը: Ռուս խաղաղապահները պէտք է պարտաւորուեն ընդունել, որ ունեն աշխատանք անելու՝ անյապաղ իրավիճակը կարգաւորելու եւ մարդասիրական ճգնաժամը վերացնելու ուղղութեամբ», յաւելեց ան։
Արցախի պետական նախարարը կոչ ըրաւ ժողովուրդին վերադառնալու Ստեփանակերտ եւ սպասել իր յայտարարութեան: «Քիչ անց ես կը հրապարակեմ ժամը, թէ երբ ենք հաւաքւում Վերածննդի հրապարակում։ Իսկ Ասկերանի շրջանի բնակիչները տեղադրում են այս վայրում իրենց վրանները եւ շարունակում են այստեղ վառուող կրակի պէս պահել Արցախում ստեղծուած մարդասիրական աղէտալի վիճակի կարմիր լոյսը։ Ստեփանակերտի Վերածննդի հրապարակում նոյնպէս տեղադրւում են վրաններ, եւ շարունակաբար նոյն կարմիր լոյսը վառած ենք պահելու Ստեփանակերտում։ Այս բոլոր գործողութիւններին շարունակելու են մասնակցել Մարտունու եւ Մարտակերտի բնակիչները», ըսաւ Գուրգէն Ներսիսեան ու ընդգծեց. «Պէտք է պայքարենք մեր նախնիների երկրում ապրելու իրաւունքի համար»։
