«Ուքրանիոյ մէջ սկիզբ առած պատերազմէն յետոյ Ռուսիան սկսած է շարք մը ռազմական նշանակութեան ապրանքատեսակներ ներմուծել Հայաստանի եւ Ղազախստանի օգնութեամբ` շրջանցելով պատժամիջոցները», վերջերս հրապարակուած յօդուածի մէջ կը պնդէ ամերիկեան «The New York Times» պարբերականը:
Թերթը կը վկայակոչէ ԱՄՆ Հարկային Ծառայութիւններու եւ Առեւտուրի Նախարարութեան աշխատակիցներուն մասնակցութեամբ Մարտ 24-ին տեղի ունեցած խորհրդակցութեան ժամանակ ներկայացուած նիւթերը: Անոնց համաձայն` 2022 թուականին, նախորդ տարուան համեմատ, Միացեալ Նահանգներէն Հայաստան չիփերու եւ փրոցեսներու ներկրումը աճած է 515 տոկոսով: Նոյն ապրանքատեսակներու ներկրումը ԵՄ պետութիւններէն Հայաստան 2022 թուականին աճած է 212 տոկոսով:
«Ներկրուած արտադրանքին 97 տոկոսը հետագային վերաարտահանուած է Ռուսիա», կը պնդէ «The New York Times»-ը:
Թերթին պնդմամբ` ներկրուած սարքաւորումները կարեւոր նշանակութիւն ունին Ռուսիոյ ռազմական արդիւնաբերութեան` մասնաւորաբար հրթիռներու արտադրութեան համար: