Ապրիլ 18-ին ՀՀ արտաքին գործերու նախարար Արարատ Միրզոյեան հանդիպած է ԱՄՆ պետական քարտուղարի փոխտեղակալ Էրիքա Օլսոնին:
Հանդիպման մասնակցած է նաեւ ԱՄՆ Կովկասեան բանակցութիւններու հարցերով աւագ խորհրդական, ԵԱՀԿ Մինսքի Խումբի համանախագահ Լուի Պոնօն:
Քննարկուած են տարածաշրջանին մէջ կայունութեան հաստատման, Հայաստան-Ատրպէյճան յարաբերութիւններու կարգաւորման, սահմանազատման եւ սահմանային անվտանգութեան, տարածաշրջանին մէջ բոլոր տնտեսական ու փոխադրութեան կապերու ապաշրջափակման, Լեռնային Ղարաբաղի հիմնախնդիրին շուրջ հարցեր:
Արարատ Միրզոյեան ներկայացուցած է առկայ առանցքային խնդիրներու կարգաւորման հարցով հայկական կողմին մօտեցումները, այդ շարքին` համապարփակ ու կայուն խաղաղութեան հասնելու նպատակով Լեռնային Ղարաբաղի հայերու իրաւունքներու եւ անվտանգութեան հարցերու հասցէագրման վերաբերեալ: Նախարար Միրզոյեան վերահաստատած է խաղաղութեան գործընթացին ՀՀ յանձնառութիւնը` ընդգծելով Ատրպէյճանի կողմէ առաւելապաշտական նկրտումներէն, ԼՂ ժողովուրդին ու ՀՀ տարածքային ամբողջականութեան նկատմամբ յարձակողական քաղաքականութենէն ու ռազմատենչ հռետորաբանութենէն հրաժարելու կարեւորութիւնը:
Զրուցակիցները անդրադարձ կատարած են Լեռնային Ղարաբաղի մէջ ստեղծուած մարդասիրական իրավիճակին, 2020թ. Նոյեմբեր 9-ի յայտարարութեան դրոյթներուն համապատասխան Լաչինի միջանցքի ապօրինի արգելափակման վերացման հրամայականին:
Միտքեր փոխանակուած են նաեւ ՀՀ-ԱՄՆ երկկողմ օրակարգի, այդ շարքին` ռազմավարական երկխօսութեան առնչուող հարցերու շուրջ:
