Ատրպէյճանական իշխանութիւնները անցած են Արցախի ցեղային զտման եւ պատմական հայրենիքէն անոր ժողովուրդի վտարման իրենց յանցաւոր ծրագրի յաջորդ փուլի իրագործման, յայտարարած է Արցախի Արտաքին Գործերու Նախարարութիւնը` Ապրիլ 4-ին Գորիս-Ստեփանակերտ ճանապարհին տեղի ունեցածը որակելով` քաղաքացիներու իրաւունքներու հերթական կոպտագոյն խախտում:
Արցախի Ներքին Գործերու Նախարարութիւնը հաղորդեց, որ Գորիս-Ստեփանակերտ մայրուղիի արգելափակուած հատուածին մէջ ատրպէյճանցի «բնապահպանները» արգիլած են ռուս խաղաղապահներուն Արցախ տեղափոխել 27 քաղաքացիներ: Արտաքին Գործերու Նախարարութիւնը նշած է, որ ատրպէյճանական կողմը 5 ժամ շարունակ հոգեբանական ահաբեկման ենթարկած է ինքնաշարժներուն մէջ գտնուողները` հիմնականին մէջ կիներ, երեխաներ եւ տարեց մարդիկ, անուհետեւ փորձ ըրած է մարդոց տառապանքները վերածել կեղծ մարդասիրութեան բեմադրութեան:
Բացարձակ անպատժելիութեան պայմաններու մէջ Արցախի ժողովուրդին դէմ Ատրպէյճանի կողմէ իրականացուող յանցաւոր գործողութիւնները աւելի սպառնալից բնոյթ եւ ծաւալներ կը ստանան, կը յայտարարէ Արցախի արտաքին քաղաքական գերատեսչութիւնը շեշտելով` մարդու իրաւունքներու այդքան լուրջ ոտնահարումներուն հանդէպ միջազգային հանրութեան անգործութիւնը հաւասարազօր է լռելեայն հաւանութեան, եթէ ոչ յանցակցութեան պաշտօնական Պաքուի հակամարդկային գործողութիւններուն:
Ստեփանակերտը բացարձակ անհրաժեշտութիւն կը համարէ համապատասխան մանտաթ եւ գործիքակազմ ունեցող ՄԱԿ Անվտանգութեան Խորհուրդին կողմէ անյետաձգելի եւ վճռական միջոցներու ձեռնարկումը` ապօրինի շրջափակման անյապաղ դադրեցման եւ միջազգային հանրութեան աչքին առջեւ Արցախի ժողովուրդին դէմ Ատրպէյճանի շարունակուող յանցագործութիւններու կանխման համար:
Ատրպէյճանը արդէն 110 օրէ փակ կը պահէ Արցախը Հայաստանին կապող միակ ճանապարհը` Լաչինի միջանցքը: