Հայաստանի Զինուած Ուժերու գլխաւոր շտաբի պետ, պաշտպանութեան նախարարի առաջին տեղակալ, զօրավար Էտուարտ Ասրեան Նիւ Տելհիի մէջ Հնդկաստանի պաշտպանութեան շտաբի պետ, զօրավար Անիլ Չաուհանի հետ քննարկած է երկկողմ համագործակցութեան եւ տարածաշրջանային անվտանգութեան հարցեր, այդ շարքին` պաշտպանութեան ոլորտին մէջ Հայաստանի եւ Հնդկաստանի համագործակցութեան ընդլայնման հնարաւորութիւնները:
Ըստ Հայաստանի ռազմական գերատեսչութեան` Ասրեան մասնակցած է նաեւ Հնդկաստանի Ազգային Անվտանգութեան Խորհուրդի աշխատակազմին մէջ տեղի ունեցած տարածաշրջանային անվտանգութեան եւ հայ-հնդկական պաշտպանական համագործակցութեան շուրջ քննարկումներուն, ներկայացուցած են Հայաստանի շուրջ ծառացած անվտանգային մարտահրաւէրները:
ԳՇ պետը Հնդկաստանի մէջ համաշխարհային անվտանգութեան խնդիրներուն նուիրուած ամէնամեայ «Ռաիսինա Երկխօսութիւն» խորագրով միջազգային համաժողովին մասնակցելու նպատակով:
Հայ-հնդկական յարաբերութիւնները սկսան նկատելիօրէն աշխուժանալ յատկապէս 44-օրեայ պատերազմէն յետոյ, երբ Փաքիստանը, որ շարք մը հարցերու մէջ Հնդկաստանի հետ հակամարտութեան մէջ է, Ատրպէյճանին ցուցաբերեց դիւանագիտական եւ ռազմական աջակցութիւն: Պաշտօնական Երեւանը յայտարարած է, որ Հնդկաստանի հետ յարաբերութիւններու համակողմանի խորացումը եւ զարգացումը Հայաստանի արտաքին քաղաքական գերակայութիւններէն է: