Ներքին գործերու նախարար Վահէ Ղազարեանի հրամանով երկրաշարժի հետեւանքով տուժած Թուրքիոյ եւ Սուրիոյ մէջ որոնողափրկարարական աշխատանքներ իրականացուցած խումբ մը փրկարարներ պարգեւատրուած են մետալներով եւ յուշանուէրներով: Ներքին Գործերու Նախարարութեան Փրկարար Ծառայութեան տնօրէն, ներքին գործերու նախարարի տեղակալ Կամօ Ցուցուլեանը հանդիսաւոր պայմաններու մէջ պարգեւները յանձնած է փրկարարներուն:
Տնօրէնը ներքին գործերու նախարարին եւ անձամբ իր անունով շնորհակալութիւն յայտնած է փրկարարներուն, իրենց դրսեւորած մասնագիտական բարձր պատրաստակամութեան եւ մարդկային որակներուն համար, շեշտելով որ իւրաքանչիւր լաւ աշխատանք միշտ արժանի գնահատական պիտի ստանայ:
Ցուցուլեանը մասնաւորապէս նշած է․ «Ուզում եմ ընդգծել, որ ձեր առջեւ դրուած խնդիրները կատարել էք արհեստավարժ բարձր մակարդակով: Հայկական քաղաքային որոնողափրկարարական երկու խումբերն էլ լաւագոյնս կատարեցին իրենց մարդասիրական առաքելութիւնը` դրսեւորելով ուժ, կամք, աշխատասիրութիւն եւ անվեհեր փրկարարի վառ օրինակ»:
Արարողութեան աւարտին տնօրէնը եւս մէկ անգամ շնորհակալութիւն յայտնած է փրկարարներուն, վերջիններուս մաղթելով բարի եւ անփորձանք ծառայութիւն: