Եւրոպական Խորհրդարանի Արտաքին Յարաբերութիւններու Յանձնաժողովի նոր զեկոյցը կոչ կ’ընէ Ատրպէյճանին դուրս բերելու զօրքերը Հայաստանի տարածքէն: Խաղաղութեան որեւէ պայմանագիր պէտք է ներառէ Հայաստանի Հանրապետութեան տարածքային ամբողջականութիւնը, Լեռնային Ղարաբաղի հայ բնակչութեան իրաւունքներն ու անվտանգութիւնը, փախստականներու եւ ներքին տեղահանուածներու արագ եւ անվտանգ վերադարձը իրենց տուներ, կ’ընդգծէ զեկոյցը:
«Եւրոմիութիւն-Հայաստան յարաբերութիւններուն վերաբերեալ զեկոյցը եւս մէկ անգամ կը վերահաստատէ Եւրոխորհրդարանի հաւատարմութիւնը տարածաշրջանին մէջ խաղաղութեան եւ շարք մը կարեւոր ոլորտներու մէջ Հայաստանի եւ ԵՄ համագործակցութեան: Որպէս այս ուղղութեամբ կենսական քայլ` մենք կ’ողջունենք Հայաստանի մէջ ԵՄ առաքելութեան ստեղծումը եւ Ատրպէյճանի կառավարութեան կոչ կ’ընենք երաշխաւորելու տեղաշարժի ազատութիւնն ու անվտանգութիւնը Լաչինի միջանցքով, որ գրեթէ երկու ամիսէ արգելափակուած է», յայտնած է զեկուցող Անտրէ Քովաչեւը քուէարկութենէն յետոյ:
Հայաստան-ԵՄ յարաբերութիւնները վերանայող` նախօրէին ընդունուած զեկոյցին մէջ Եւրոխորհրդարանի պատգամաւորները խստօրէն կը դատապարտեն 2022 թուականի Սեպտեմբերին Ատրպէյճանի կողմէ Հայաստանի վրայ իրականացուած լայնածաւալ ռազմական յարձակումը:
Զեկոյցը Ատրպէյճանի իշխանութիւններուն կոչ կ’ընէ դուրս բերելու զօրքերը Հայաստանի տարածքի բոլոր հատուածներէն, նաեւ երկու երկիրներու կառավարութիւններուն կոչ կ’ընէ աշխատելու համապարփակ եւ փոխընդունելի խաղաղութեան պայմանագրի վրայ:
Եւրոխորհրդարանի պատգամաւորները կը գովաբանեն Հայաստանին վերջին տարիներուն ձեռնարկած նշանակալի բարեփոխումներու եւ ժողովրդավարացման գործընթացին համար` բարեփոխումներ, «որոնց շնորհիւ երկիրը դարձաւ ժողովրդավարութեան առաջատարը տարածաշրջանին մէջ»:
