Քրեմլինը յայտարարած է, որ Լեռնային Ղարաբաղի մէջ տեղակայուած ռուս խաղաղապահները ՄԱԿ-ի մանտաթով օժտելու, ինչպէս նաեւ միջազգային ուժերու հնարաւոր ներգրաւման համար անհրաժեշտ է երկու հակամարտող կողմերու` Հայաստանի եւ Ատրպէյճանի համաձայնութիւնը:
Լրագրողներու խնդրանքին` մեկնաբանելու վարչապետ Նիկոլ Փաշինեանի առաջարկը, Ռուսիոյ նախագահի մամուլի խօսնակ Տմիթրի Փեսքով պատասխանած է. «Միջազգային խաղաղապահները կրնան ներգրաւուիլ, եթէ ըլլայ հակամարտութեան երկու կողմերուն համաձայնութիւնը: Եւ սա ոչ միայն Հայաստանն է, այլեւ՝ Ատրպէյճանը»:
Քրեմլինի ներկայացուցիչը միաժամանակ նշած է. «Հայաստանը մեր ամենամօտ դաշնակիցներէն է, Ատրպէյճանը` մեր արժէքաւոր գործընկերը: Իսկ Ռուսիոյ Դաշնութիւնը կը շարունակէ եւ պիտի շարունակէ իր միջնորդական ջանքերը` կատարելով առաջին հերթին այն պայմանաւորուածութիւնները, որոնք ձեռք բերուած են եռակողմ հիմքով»: