Ռուսիոյ եւ Պելառուսիոյ միութենական պետութեան միանալու հարցով Հայաստանի վրայ ճնշում գործադրելու մասին լուրերը փաստերով հիմնաւորուած չեն եւ չեն համապատասխաներ իրականութեան: Այս մասին ճեպազրոյցի ընթացքին յայտնած է Ռուսիոյ Դաշնութեան Արտաքին Գործերու Նախարարութեան պաշտօնական ներկայացուցիչ Մարիա Զախարովան:
Դիւանագէտը յայտնած է, որ եթէ նման յայտարարութիւններ կը կատարուին առանց փաստերու, եւ միեւնոյն ժամանակ կը նշեն երկիրը եւ պահանջներ կը ներկայացնեն անոր, ապա այդ պէտք է հիմնաւորել փաստերով:
«Կա՞ն փաստեր: Ինչպէ՞ս հարկադրուած է: Ինչպէ՞ս այդ տեղի ունեցած է… Ոեւէ ռուս պաշտօնեայ երբեք չէ խօսած միութենական պետութեան Հայաստանի միանալու մասին: Այս կարգի բոլոր յայտարարութիւններուն գնահատականներ տրուած են», ըսած է Զախարովան:
Ռուսիոյ Դաշնութեան Արտաքին Գործերու Նախարարութեան ներկայացուցիչը նշած է, որ նոյնը կարելի է ըսել այն լուրերու փիրին մէջ, թէ Մոսկուան Երեւանին կը պարտադրէ միջանցք տրամադրել Ատրպէյճանին:
«Սա կեղծիք է, որուն մասին նոյնպէս բազմիցս խօսուած է: Հայաստանի, Ատրպէյճանի եւ Ռուսիոյ Դաշնութեան ղեկավարներու 2021 թուականի Յունուար 11-ի յայտարարութեան համաձայն` տարածաշրջանին մէջ բոլոր տնտեսական եւ ճանապարհային կապերու ապաշրջափակման հարցերով եռակողմ աշխատանքային խումբի ծիրին մէջ կը քննարկուին հաղորդակցութիւններու բացման տարբեր ուղիներ, այդ շարքին` Հայաստանի հարաւը երկաթուղային գծով երթեւեկութեան վերականգնման հետ կապուած հարցեր: Այս աշխատանքին սկզբունքներէն մէկը, որ չի վիճարկուիր ո՛չ Երեւանի, ո՛չ Պաքուի կողմէ, այն է, որ երթուղիներու նկատմամբ ինքնիշխանութիւնը կը պատկանի այն կողմին, որուն տարածքով անոնք կ՛անցնին», ընդգծած է Զախարովան: