Հայաստանը կը պաշտպանէ ռուսական կողմէ ընթացիկ տարուայն Օգոստոսին ներկայացուած առաջարկները, որոնք կրնան Հայաստանի եւ Ատրպէյճանի միջեւ յարաբերութիւններու կարգաւորման հետագայ բանակցութիւններուն հիմք հանդիսանալ, յայտնած է վարչապետ Նիկոլ Փաշինեան ԵԱՀԿ Մինսքի Խումբի ռուս համանախագահ, հայ-ատրպէյճանական յարաբերութիւններու կարգաւորման աջակցելու հարցերով Ռուսիոյ արտաքին գործերու նախարարի յատուկ ներկայացուցիչ Իկոր Խովաեւի հետ հանդիպման:
Փաշինեանն ու Խովաեւը քննարկած են Սոչիի մէջ Հոկտեմբեր 31-ին տեղի ունեցած Հայաստանի, Ռուսիոյ եւ Ատրպէյճանի առաջնորդներուն եռակողմ հանդիպման արդիւնքներուն, հայ-ատրպէյճանական յարաբերութիւններու կարգաւորման գործընթացին ու Լեռնային Ղարաբաղի հիմնախնդիրին հետ կապուած հարցեր:
Իկոր Խովաեւին հանդիպած է նաեւ Հայաստանի արտաքին գործերու նախարար Արարատ Միրզոյեանի հետ:
Հայաստանի Արտաքին Գործերու Նախարարութեան փոխանցմամբ` անոնք եւս քննարկած են Հայաստանի եւ Ատրպէյճանի միջեւ յարաբերութիւններու կարգաւորման, Լեռնային Ղարաբաղի հիմնահարցի հանգուցալուծման առնչուող վերջին զարգացումները, ինչպէս նաեւ անդրադարձած են Հոկտեմբեր 31-ին Սոչիի մէջ կայացած Հայաստանի, Ռուսիոյ եւ Ատրպէյճանի ղեկավարներու վերջին եռակողմ հանդիպման ու ընդունուած համատեղ յայտարարութեան:
Հայաստանի արտաքին գործերու նախարարը շեշտած է ուժի կամ ուժի սպառնալիքի կիրառումէն զերծ մնալու կողմերուն յանձնառութեան կարեւորութիւնը` նշելով, որ «Ատրպէյճանը իր յարձակողական վարքագիծով եւ առաւելապաշտական նկրտումներով կը շարունակէ խոչընդոտել տարածաշրջանին մէջ կայուն ու երկարաժամկէտ խաղաղութեան հաստատման»:
Արարատ Միրզոյեանը եւ Իկոր Խովաեւը միտքեր փոխանակած են նաեւ Հայաստանի եւ Ատրպէյճանի միջեւ սահմանազատման գործընթացին, ինչպէս նաեւ տարածաշրջանի ճանապարհային ենթակառուցուածքներու ապաշրջափակման վերաբերեալ: