Վերակառուցման եւ Զարգացման Եւրոպական Դրամատունը վերանայած է Հայաստանի համար տնտեսական աճի կանխատեսումը, դրամատունը կը կանխատեսէ, որ 2022-ի արդիւնքով Հայաստանի ՀՆԱ-ի աճը պիտի կազմէ 8 տոկոս: ՎԶԵԴ-ը հրապարակած է իր վերջին «Տարածաշրջանային Տնտեսական Հեռանկարները» զեկոյցը:
ՎԶԵԴ-ը իր կայքին մէջ նաեւ յօդուած հրապարակած է` վերնագրելով «Տնտեսական Ուժեղ Ցուցանիշներ` Կովկասի Մէջ Աշխարհաքաղաքական Ցնցումներու Պայմաններուն Մէջ»: Կը նշուի, որ տարածաշրջանի երկիրները կ’արձանագրեն վերջին տարիներու իրենց ամենաբարձր աճի կշռոյթները, սակայն տնտեսական աճը հիմնականին մէջ պայմանաւորուած է ժամանակաւոր գործօններով, որոնք կրնան հեշտութեամբ փոխուիլ:
«Հայաստանի մէջ տնտեսութեան ամուր վերականգնումը նկատուած է 2021-ին, աճը ուժեղ թափ առած է 2022-ին: Հայաստանի տնտեսական աշխուժութեան աճը Յունուար-Յուլիս ինկած ժամանակահատուածին հասած է 13,1 տոկոսի», ըսուած է ՎԶԵԴ հաղորդագրութեան մէջ:
Կը նշուի, որ ինչպէս Վրաստանի, այնպէս ալ Հայաստանի մէջ Ռուսիայէն բազմաթիւ մարդոց եւ ընկերութիւններու ժամանումը յանգեցուցած է արտասահմանեան ներհոսքի աճի եւ ծառայութիւններու պահանջարկի աւելացման:
«Սա օգնած է Հայաստանին ֆինանսաւորել իր աճող առեւտրային բացը: Արտաքին պահուստները աճած են 20 տոկոսով, իսկ փոխարժէքը` 18 տոկոսով: Ըստ զեկոյցին` 2022-ի համար կը կանխատեսւուի 8 տոկոս կայուն աճ` նախորդ`4. 5 տոկոս աճի կանխատեսման դիմաց: Իսկ 2023-ին կը դիտուի դանդաղում` մինչեւ 4 տոկոս նուազում: Այնուամենայնիւ, 2023 թուականի համար աճի վերջին կանխատեսումը աւելի վաղ կանխատեսած 2.5 տոկոսէն բարձր կը մնայ, այսինքն` 4 տոկոս», ըսուած է ՎԶԵԴ հաղորդագրութեան մէջ:
2021-ին Հայաստանի համար ՎԶԵԴ-ը կանխատեսած էր 5.7 տոկոս տնտեսական աճ, իսկ 2020-ին` 7.2 տոկոս անկում:
