ԵԱՀԿ Մինսքի Խումբի նորանշանակ ամերիկացի համանախագահ, Կովկասի հարցերով բանակցութիւններուն մէջ ԱՄՆ յատուկ ներկայացուցիչ Ֆիլիփ Ռիքըր այս շաբաթ պիտի այցելէ Հարաւային Կովկասի երկիրներ:
Այս մասին ճեպազրոյցի մէջ յայտարարելած է ԱՄՆ Արտաքին Գործերու Նախարարութեան Մամուլի Ծառայութեան ղեկավարի տեղակալ Վետանթ Փաթելը:
Սա պիտի ըլլայ Ռիքըրի առաջին ուղեւորութիւնը նոր պաշտօնին մէջ:
«Յոյսով ենք, որ տարածաշրջան այցերը պարբերական պիտի ըլլան: Ան պիտի այցելէ Հայաստան, Վրաստան եւ Ատրպէյճան: Ան հանդիպումներ պիտի ունենայ երեք երկիրներու բարձրաստիճան պաշտօնեաներուն հետ` տարածաշրջանի առանցքային խնդիրները, ինչպէս նաեւ վիճելի հարցերու կառուցողական լուծումները եւ տարածաշրջանային համագործակցութեան համար աջակցութեան ու անմիջական ներգրաւման հնարաւորութիւնները քննարկելու համար», ըսած է Փաթել: