Երեւան քաղաքի Աւան եւ Նոր Նորք վարչական շրջաններու Ընդհանուր Իրաւասութեան դատարանին մէջ, Վահէ Միսակեանի նախագահութեամբ, ՀՀ երրորդ նախագահ Սերժ Սարգսեանի եւ միւսներուն գործով հերթական դատական նիստը կրկին յետաձգուած է` վկայ Սեւան Քոչարեանի, որուն ցուցմունքին հիման վրայ յարուցուած է գործը, նիստին չներկայանալու պատճառով:
Նախորդ դատական նիստը եւս յետաձգուած էր, քանի որ գործով վկաները կրկին չէին ներկայացած դատարան: Անոնցմէ մէկուն ոստիկանութիւնը պէտք է դատարանի որոշմամբ բերման ենթարկէր նիստին, սակայն, փաստացի, դատարանին որոշումը չէր կատարուած:
Դատաւորը յայտարարած է, որ կրկին պիտի դիմեն ոստիկանութիւն` վկայ Սեւան Քոչարեանը յաջորդ նիստին բերման ենթարկելու համար:
Միւս վկան դատարանին տեղեկացուցած էր, որ անձնական պատճառներով կը բացակայէ երկրէն եւ չի կրնար ներկայ գտնուիլ նիստին:
