Հայաստանի տնտեսական աշխուժութեան ցուցանիշը 2022 թուականի Յունուար-Յուլիսին 13.1 տոկոսով աւելցած է նախորդ տարուան նոյն ժամանակահատուածին համեմատ: Այս մասին կը փաստեն ՀՀ Վիճակագրական Կոմիտէին հրապարակած տուեալները:
Արդիւնաբերական արտադրանքի ծաւալը այս տարուան Յունուար-Յուլիսին նախորդ տարուան նոյն ժամանակահատուածին համեմատ աւելցած է 7 տոկոսով:
Շինարարութեան ծաւալը 2022-ի Յունուար-Յուլիսին նախորդ տարուան նոյն ժամանակին համեմատ աւելցած է 13.6 տոկոսով:
Առեւտուրի շրջանառութեան մէջ 2022-ի առաջին 7 ամսուան մէջ 2021-ի նոյն ժամանակահատուածին նկատմամբ աւելցումը կազմած է 12.5 տոկոս:
Հայաստանի մէջ այս տարուան Յունուար-Յուլիսին մատուցուած ծառայութիւններուն ծաւալը նախորդ տարուան նոյն ժամանակահատուածին նկատմամբ աւելցած է 27.5 տոկոսով:
2022 թուականի Յունուար-Յուլիսին սպառողական գիներու ցուցակը 2021-ի Յունուար-Յուլիսի համեմատ աճած է 8.3 տոկոսով, արդիւնաբերական արտադրանքի գիներու ցուցակը` 6.3 տոկոսով: Ելեկտրականութեան արտադրութեան ծաւալը Յունուար-Յուլիսին նախորդ տարուան նոյն ժամանակին համեմատ աւելցած է 14.9 տոկոսով:
Արտաքին առեւտրաշրջանառութեան ծաւալներուն մէջ այս տարուան առաջին 7 ամսուան մէջ նախորդ տարուան նոյն ժամանակին համեմատ արձանագրուած է 47.7 տոկոս աճ: Ընդ որում` 2022 թուականի Յունուար-Յուլիսին նախորդ տարուան նոյն ժամանակին համեմատ արտահանումը աճած է 43.9 տոկոսով, իսկ ներմուծումը` 50.1 տոկոսով:
Դրամին փոխարժէքը ամերիկեան տոլարին նկատմամբ Յունուար-Յուլիս ամիսներուն կազմած է 460.06:
