Հայաստանի նախագահ Վահագն Խաչատուրեան կը վստահեցնէ, որ Հայաստանի եւ Ատրպէյճանի միջեւ բանակցութիւններուն ժամանակ որեւէ միջանցքի հարց չի քննարկուիր: Ռուսիոյ հայ համայնքին հետ հանդիպման ժամանակ ՀՀ նախագահը, յիշեցնելով, որ Ատրպէյճանի նախագահը պարբերաբար կը խօսի միջանցքի մասին, շեշտած է, որ հայկական կողմին համար անընդունելի է որեւէ միջանցքային տրամաբանութիւն:
«Այդպիսի հարց մեր կողմից ընդհանրապէս չի քննարկւում, այդ հարցը չի քննարկւում նաեւ մեր ռուս եւ եւրոպացի գործընկերների հետ քննարկումների ժամանակ: Այդ հարցը մեր կողմից քննարկման ենթակայ չէ: Մենք այլ հարց ենք քննարկում, Ատրպէյճանն ասում է, որ ուզում է կապ հաստատել Նախիջեւանի հետ: Մենք ասել ենք, որ առարկութիւն չունենք, կարող էք օգտագործել մեր ճանապարհային հնարաւորութիւնները, եկէք մտածենք` ոնց կարող ենք առկայ մաքսային, սահմանային հսկողութեան կարգերը միջազգային գործող միջազգային կանոնների շրջանակներում երկկողմ թեթեւացնել: Եւ քննարկումները սկսուել են: Հետաքրքիր հարց կայ, մենք ասում ենք եկէք սկզբունքները քննարկենք, ատրպէյճանցիներն ասում են մեզ տուէք տուեալներ, թէ որտեղով են անցնելու ճանապարհները: Մենք ասում ենք, ոչ, եկէք քննարկենք սկզբունքները, որովհետեւ սկզբունքները քննարկելուց յետոյ մնացածը մեզ համար շատ աւելի հեշտ է», ըսած է Խաչատուրեանը:
Ան յաւելած է, որ Ատրպէյճանի նախագահ Իլհամ Ալիեւը կը փափաքի իրականութիւն դարձնել իր հօր` Հէյտար Ալիեւի երազանքը: «Խորհրդային տարիներին Պաքուն Մեղրիով դէպի Նախիջեւան արագընթաց ճանապարհ էր կառուցում, եւ 1987 թուականին, եթէ չեմ սխալւում, այդ ճանապարհը կանգնեցուեց, դժգոհութիւններ եղան, հակամարտութիւն եղաւ: Այդ ճանապարհի շինարարութիւնն է նա ուզում շարունակել: Մենք պատրաստ ենք դա էլ քննարկել, բայց տեսականօրէն, եթէ դա նոյնիսկ հնարաւոր է, կիրառականօրէն հնարաւոր չէր իրականացնել, բարդ տեխնիկական խնդիր է», մանրամասնած է Խաչատուրեանը: