Թուրքիոյ արտաքին գործերու նախարար Մեւլութ Չաւուշօղլուն ֆինլանտացի պաշտօնակիցին հետ համատեղ ասուլիսի ժամանակ, խօսելով հայ-թրքական կարգաւորման նոր գործընթացին մասին, յայտնած է, որ յատուկ ներկայացուցիչներուն յաջորդ հանդիպումը Վիեննայի մէջ տեղի պիտի ունենայ հայկական կողմին ցանկութեամբ:
Ան նշած է, որ կողմերուն միջեւ հեռախօսազրոյցին ժամանակ առաջարկուած է բանագնացներուն երկրորդ հանդիպումը կայացնել Վիեննայի կամ Ժընեւի մէջ:
«Պարոն Սերտարի հետ խորհրդակցեցանք եւ հաշուի առնելով նախապէս Ժընեւի մէջ արձանագրուած անյաջողութիւնը` որոշեցինք Վիեննան ընտրել, որպէսզի նոյնը չշարունակուի», ըսած է թուրք նախարարը:
Հայաստան-Թուրքիա կարգաւորման գործընթացի ծիրին մէջ երկու երկիրներու յատուկ ներկայացուցիչներու` Ռուբէն Ռուբինեանի եւ Սերտար Քըլըճի երկրորդ հանդիպումը տեղի պիտի ունենայ 24 Փետրուարին, Վիեննայի մէջ: Բանագնացներու հանդիպման օրակարգին մասին առայժմ ոչինչ կը հաղորդուի:
Անդրադառնալով Մարտին Անթալիոյ մէջ կայանալիք դիւանագիտական համաժողովին Հայաստանի մասնակցութեան, Թուրքիոյ արտաքին գերատեսչութեան ղեկավարը յայտնած է, որ Հայաստանէն դեռ դրական պատասխան չեն ստացած:
«Գիտնականներուն եւ միւս հրաւիրեալներուն հետ մէկտեղ յատուկ ներկայացուցիչ Ռուբինեանին եւ արտաքին գործերու նախարարին հրաւէր ուղարկած ենք: Փաշինեանին հրաւէր չենք ուղարկած, երկիրներու ղեկավարներուն նախագահը հրաւէր կ’ուղարէ: Այս պահուն մօտ 60 նախարար հաստատած են իրենց մասնակցութիւնը: Հայաստանէն հաստատում դեռ չենք ստացած», ըսած է Չաւուշօղլուն:
