Մինչեւ երկաթուղագիծի Մեղրիի, այնուհետեւ Հորադիզ տանող հատուածներու կառուցումը, այժմ կը քննարկուի Երասխը ատրպէյճանական Սադարակին կապող երկաթուղագիծի քանի մը հարիւր մեթրի վերագործարկումը, ինչ որ թոյլ կու տայ Հայաստանը երկաթուղագիծով կապել Իրանին: Այսօր՝ Դեկտեմբեր 22-ին «Ազատութիւն»ի հարցին ի պատասխան ըսաւ փոխվարչապետ՝ Մհեր Գրիգորեան։
«Անկեղծ ասած` մենք նման ցանկութիւն ունենք, եւ ի հարկէ, ցանկացած հնարաւորութիւն ապաշրջափակման, որը հնարաւոր է իրականացնել այսօր գործող ենթակառուցուածքների շնորհիւ, ի հարկէ, ցանկալի է, որ տեղի ունենայ, բայց անկեղծ ասած` բնականաբար, դա բանակցութիւնների առարկայ է, եւ ասել միանշանակ, որ դա տեղի կ’ունենայ, կամ նոյն Վրաստանի հատուածը տեղի կ’ունենայ անմիջապէս, ես հիմա չեմ կարող ասել, որովհետեւ այո, բանակցութիւններում դա կայ, բայց ինչ վերջնական համաձայնութեան կու գանք, դեռեւս չեմ կարող ասել», – մանրամասնեց փոխվարչապետը:
Գրիգորեան, որ կը ներկայացնէ Հայաստանը Ռուսաստանի միջնորդութեամբ գործող եռակողմ՝ Ատրպէյճանի հետ միասին փոխվարչապետերու աշխատանքային խումբին մէջ, անցեալ շաբաթ «Ազատութիւն»ին հաղորդած էր, որ Մեղրիի հատուածին 45 քիլոմեթրնոց երկաթուղագիծի կառուցումը կ’արժէ մօտ 200 միլիոն տոլար, շինարարութիւնը կը տեւէ մինչեւ երեք տարի: Սակայն ո՛չ նախորդ շաբաթ եւ ո՛չ ալ այսօր փոխվարչապետը չյստակացուց, թէ երբ պիտի սկսի երկաթուղագիծի հայաստանեան հատուածի շինարարութիւնը։
Մինչդեռ, Հորադիզէն դէպի Հայաստան երկարող մօտ հարիւր քիլոմեթրնոց երկաթուղագիծի կառուցման աշխատանքները Ատրպէյճանի մէջ սկսած են այս Փետրուարին։ Պաքուն ծրագրած է աւարտել զայն մինչեւ 2023-ի վերջը, ինչպէս օրերս տուած հարցազրոյցին նշած էր Ատրպէյճանի ղեկավարը։
